Por Europa Press / Redacción | SANTIAGO DE COMPOSTELA | 08/01/2020 | Actualizada ás 15:43
Común dá Esquerda manifestou este mércores o seu apoio á plataforma 'Verín non se pecha' e cualificou de "auténtico atentado contra o rural" o peche do paridoiro de Verín, efectivo desde o pasado mes de decembro. Así o expresaron os representantes do grupo Ánxeles Cuña e Antón Sánchez, ao termo do encontro mantido este mércores con persoal sanitario do Hospital de Verín.
Neste contexto, Ánxeles Cuña dixo entender a situación de Verín como "a punta do iceberg" da "nefasta política sanitaria de Feijóo que persegue o peche de todos os hospitais comarcais".
A falta de pediatras á que alude a Xunta de Galicia para tomar a decisión do cesamento do servizo é para Común da Esquerda "un pretexto do PP para seguir desmantelando o sistema sanitario galego e os servizos do rural", sinalou Antón Sánchez. Con todo, o certo é que a Xunta convocou dúas prazas de pediatra para este hospital ás que non se presentou ninguén.
"O Goberno galego tivo dez anos e todas as ferramentas na súa man para contar con pediatras en todos os hospitais, só ten que facer ben o seu traballo", continuou Antón Sánchez.
Así mesmo, Ánxeles Cuña dixo ter "a certeza" de que "hai persoas que entregaron a súa solicitude para cubrir as prazas de pediatría en Verín", un procedemento que pechou o seu prazo o pasado martes.
Por este motivo, pediu "saber agora cal é o seguinte paso", dado que entende que o peche do paridoiro de Verín debe "pasarlle factura" ao xerente do CHUO, Félix Rubial; ao conselleiro de Sanidade, Jesús Vázquez Almuíña; e ao presidente da Xunta de Galicia, Alberto Núñez Feijóo.
NEGOCIO
Por parte de Común da Esquerda solicitaron de novo a Feijóo que "retroceda na súa decisión de pechar o paridoiro de Verín e tamén na súa intención de desmantelar a sanidade pública". Ademais, acusou ao presidente da Xunta de "dar negocio á sanidade privada" en detrimento dos servizos públicos do medio rural.
Común da Esquerda ve nestas acusacións "unha razón máis para que o PP deixe en 2020 de estar á fronte dos cidadáns galegos" e mostrou a súa aposta por "un goberno que pense no interese xeral fronte ao negocio duns poucos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.