Grupos municipais de Santiago confían en que a investidura de Pedro Sánchez permita "desbloquear" actuacións "urxentes" e "pendentes"

O alcalde de Santiago, Xosé Sánchez Bugallo, e os portavoces dos grupos locais do BNG e de Compostela Aberta, mostráronse esperanzados en que a investidura de Pedro Sánchez e a futura conformación de Goberno permita "desbloquear" actuacións "urxentes" para a cidade que permanecen "pendentes", como a modificación do convenio da Intermodal ou a convocatoria do Real Padroado.

Bugallo afirmou que a consecución da investidura "en si é unha boa noticia", porque "se poderá superar este período de precariedade" no que se foron "aprazando" unha "serie de decisións" importantes para a cidade.

Entre elas mencionou a licitación da ligazón 'orbital', que aprobou o último consello de ministros, destacando que "quedan aínda algúns máis", entre eles a modificación do convenio da intermodal para eliminar o requisito dos 3,5 millóns de viaxeiros.

Para esta cuestión, lembrou, será necesario "esperar a ver quen é o ministro ou ministra de Fomento". "Eses temas estaban falados e acordados co ministro saínte, polo que, se continúa no mesmo posto, entendo que os temas irán adiante nos termos que están falados. Se non é así, terémonos que pór en contacto co novo", explicou.

Do mesmo xeito, explicou, tamén haberá que coñecer o nome do novo ministro ou ministra de cultura, do "vicepresidente efectivo" do Goberno e do responsable de Medio Ambiente, por cuestións como a Estación Depuradora da Silvouta ou a preparación do Ano Santo 2021.

Do mesmo xeito, exporase tamén a reunión do Real Padroado, unha cuestión na que, "desgraciadamente", vaise "un pouco máis tarde" do desexado.

"POSITIVO" PARA COMPOSTELA ABERTA

Na mesma liña, o exalcalde e portavoz de Compostela Aberta, Martiño Noriega, considerou "positivo" que se produciu a investidura para "activar cuestións" pendentes.

Entre elas, mencionou a convocatoria do Real Padroado, unha "ferramenta de capitalidade que ten que dar unha inxección de orzamento para a cidade". Este órgano, lembrou, está aceptado pola Casa Real desde 2017, aínda que, polo momento, "non se puido convocar".

Martiño Noriega lembrou que o Real Padroado "implica unha carteira de investimentos para a cidade" que é necesario aproveitar. Por iso, e aínda que "non hai tempo" para 2021, instou a "comprometer un capítulo de investimentos" tendo en conta a proximidade do seguinte Ano Santo.

A maiores, mencionou cuestións como a ligazón orbital, a modificación do convenio da intermodal ou o cambio de nome efectivo do aeroporto da cidade, entre outras cuestións.

A nivel estatal, Noriega explicou que no Congreso se contrapuxeron "dous modelos de Estado", un "que aposta pola diversidade, polas diferentes lecturas territoriais, polo social", e, doutra banda, "unha dereita que está tirada ao monte e está secuestrada pola extrema dereita, discursivamente e polas actitudes" de "crispación".

UN ACORDO "MAGNÍFICO" CO BNG

Pola súa banda, a portavoz municipal do BNG, Goretti Sanmartín, reivindicou o acordo "magnífico" para a cidade alcanzado polo deputado nacionalista Néstor Rego para dar apoio á investidura de Sánchez e sobre o que, advertiu, farán un "estrito seguimento".

"Onte foi un bo día para Galicia", dixo Sanmartín, que quixo pór en valor as "cuestións que benefician" a cidade dentro deste acordo de investidura, como a transferencia da AP-9 e a bonificación das peaxes, a creación dun xulgado específico de violencia de xénero para Santiago ou o fin da "dobre tributación" para os emigrantes retornados.

Así mesmo, puxo en valor os compromisos en materia de Lei de Dependencia e a "necesidade de mellorar a taxa de reposición dos funcionarios público", unha cuestión que "afecta" a Santiago de forma específica.

A maiores, confiou en que o novo Goberno permita "desbloquear actuacións urxentes" na cidade, co obxectivo de que "sexan unha realidade canto antes". Entre elas, mencionou a estación de mercadorías da Sionlla, o Plan de Usos para a vella terminal de Lavacolla, o cambio de nome do aeroporto ou a urbanización da rotonda de Conxo, entre outros elementos.

PP

Finalmente, o deputado do PP Ramón Quiroga expresou a "preocupación" do seu grupo polo futuro Goberno de Pedro Sánchez e puxo en dúbida que vaia "estar a apoiar a Santiago". "As preferencias están por outras comunidades autónomas", dixo o edil popular, que instou a "ver como van as cousas" estas próximas semanas.