Caballero ve na "rectificación de Feijóo" con Verín o inicio dun cambio na Xunta

Pide que a cidadanía se mobilice na manifestación convocada para o domingo 9 de febreiro en defensa da sanidade pública.

Por Europa Press / Redacción | SANTIAGO DE COMPOSTELA | 19/01/2020 | Actualizada ás 18:46

Comparte esta noticia

O secretario xeral do PSdeG, Gonzalo Caballero, considera que a próxima reapertura a mediados de febreiro do paritorio do Hospital de Verín é "a primeira vitoria da maioría social progresista de Galicia en 2020".

O líder de filas dos socialistas galegos reacciona así ao anuncio da Consellería de Sanidade de que contratará esta semana a dous pediatras co obxectivo de que o servizo de partos volva estar dispoñible a comezos de febreiro. Para Caballero, é "unha rectificación" do presidente da Xunta, Alberto Núñez Feijóo, provocada por "a mobilización da cidadanía".

Ademais, o secretario xeral do PSdeG esixiu "celeridade" na reapertura do paritorio de Verín e demandou ao tamén presidente do PPdeG que acompañe esta decisión dunhas "desculpas e de asunción de responsabilidades".

"Feijóo alegaba supostos criterios técnicos para o peche do paritorio e falou de riscos para levar a cabo partos en Verín por un número de nacementos que consideraba escaso", criticou Gonzalo Caballero, quen tamén lembrou que este hospital tiña "cifras similares" que outros centros comarcais.

Non en balde, achacou o peche deste servizo a "unha decisión política" con consecuencias "moi lesivas" para a cidadanía. "Decidiu empezar por Verín pero ten programada a demolición da calidade na sanidade nas distintas bisbarras", avisou.

Finalmente, Caballero apelou á mobilización na manifestación convocada para o domingo 9 de febreiro en defensa da sanidade pública. "É máis necesario que nunca frear a esta dereita", concluíu.

O secretario xeral do PSG-PSOE, Gonzalo Caballero
O secretario xeral do PSG-PSOE, Gonzalo Caballero | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Sentidiño

Feixóo non sabía que no PP había mulleres. Pensaba que iso de parir é cousa de inmigrantes e de jipis. A partir de agora vai gobernar para a maioría.