Un relator da ONU destaca a vivenda e o emprego como os principais problemas sociais en Galicia
Advirte das "grandes diferenzas rexionais" que hai en España en materia de axudas sociais. Colectivos en risco de exclusión ven "violencia administrativa" na "excesiva burocratización" do acceso ás prestacións
Por Europa Press / Redacción | SANTIAGO DE COMPOSTELA | 28/01/2020 | Actualizada ás 14:51
O relator sobre Extrema Pobreza e Dereitos Humanos da ONU, Philip Alston, visitou este martes Santiago de Compostela no marco do seu percorrido por España e sinalou os "niveis crecentes" de desigualdade e de persoas en risco de pobreza ou exclusión que hai no país. Ademais, advertiu que hai "grandes diferenzas rexionais" en canto ás prestacións e axudas sociais.
Todo iso sinalouno en declaracións aos medios de comunicación minutos antes de participar nunha reunión na sede do Valedor do Pobo na capital galega. Neste encontro participaron, ademais da propia valedora, María Dolores Fernández Galiño, colectivos e persoas que sofren en primeira persoa situacións de discriminación por dependencia e exclusión social.
E é que, a pesar de que a economía española "mellorou excesivamente" desde a recesión do 2008, o relator das Nacións Unidas fixo fincapé nas "dificultades moi serias" de certos colectivos para "recuperarse" da crise. "A situación da xente que ten recursos mellorou excesivamente, a economía mellorou excesivamente, pero os sectores máis baixos da poboación seguen vivindo en circunstancias moi difíciles", explicou Philip Alston.
Entre os grandes retos que afrontan estes colectivos, o relator nomeou o acceso a unha vivenda e "o emprego precario". "E logo existen grandes diferenzas rexionais en canto ás prestacións", engadiu.
Neste sentido, dixo que a súa visita a España, onde estará "dez días máis", servirá para "entender" o porqué deste elevado nivel de risco de exclusión para despois "estar en condicións" de formular recomendacións respecto diso.
UN DISCURSO DE ODIO QUE TOMA "PROTAGONISMO"
Tamén en declaracións aos medios, o vicepresidente da Rede Galega contra a Pobreza (EAPN-Galicia), Daniel Bóveda, valorou a "importancia" da xornada deste martes, xa que permitirá "pór voz e cara" ao estado da pobreza en España e na Comunidade galega.
Non en balde, Bóveda fixo un chamamento a que a sociedade "non sexa cómplice" dun discurso de odio que "está a tomar protagonismo" e que o que busca é "criminalizar ás persoas que peor o están pasando" e "negar a violencia de xénero".
Durante a reunión de Philip Alston, moderada pola valedora do Pobo, diferentes persoas en risco de exclusión e colectivos que as representan expuxeron ao representante da ONU os problemas sociais, laborais e sanitarios aos que se enfrontan no seu día a día.
Entre os participantes neste foro, informan fontes do Valedor a Europa Press, estiveron inmigrantes sen papeis, enfermos de Alzheimer e entidades como a Asociación Boa Vida de Pontevedra e a Fundación Juan Soñador, entre outras.
