Por Europa Press / Redacción | SANTIAGO DE COMPOSTELA | 28/01/2020 | Actualizada ás 17:27
A presidenta da Deputación de Pontevedra, a socialista Carmela Silva, enmarcou os "insultos" do alcalde de Vilanova, Gonzalo Durán, nunha "estratexia" ideada polo presidente da Xunta e líder do PP galego, Alberto Núñez Feijóo, e o vicepresidente, Alfonso Rueda.
O rexedor arousán anunciou unha acción penal contra Silva, á que chamou "presunta delincuenta" por formar parte dunha suposta "trama" dirixida polo goberno provincial que paraliza obras para desviar eses fondos para o Concello de Vigo.
Carmela Silva manifestou este martes que cre que esta acusación supón "un despropósito total e absoluto" e enmárcaa no "modus operandi do Partido Popular" que, segundo dixo, "se moven exclusivamente na descualificación, na calumnia, na mentira, no insulto e no machismo máis rancio".
Ademais, a presidenta da Deputación manifestou que lle produce unha "profunda tristeza, desánimo, e vergoña allea" que o portavoz provincial do Partido Popular e alcalde do Concello de Cerdedo-Cotobade, Jorge Cubela, "se some a esta vergoña política".
"Quero que a xente saiba que isto é unha estratexia ideada polo señor Feijóo e polo señor Rueda", sinalou a mandataria socialista. Carmela Silva engadiu que "xa o fixeron cando gobernaba o bipartito, por tanto, a ninguén lle estrañan estes comportamentos".
"MOI NERVIOSO"
Para Carmela Silva este tipo de polémicas reflicte que "o Partido Popular está moi nervioso" porque "perderon o Goberno do Estado, perderon o goberno da Deputación e van perder a Xunta de Galicia e iso tenos fóra de si e lévalles a cometer estes gravísimos erros políticos".
"Espero que cesen nesta forma tan terrible de actuar", manifestou Silva, xa que "a política é construír para que a xente poida vivir mellor", polo que non quixo contestar as declaracións do alcalde de Vilanova. "Non lle vou a dar ás a esas descualificacións", subliñou, e, dirixíndose ao Partido Popular, indicou que "mentres eles son políticos pequenos o goberno da Deputación fai política grande".
"Sinto unha tremenda vergoña, é máis, pídolle perdón á xente porque haxa persoas así na política", concluíu a presidenta da Deputación de Pontevedra.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.