Por Galicia Confidencial | SANTIAGO DE COMPOSTELA | 29/01/2020 | Actualizada ás 22:40
Reguetón e poesía xuntas? Pois claro! O Aquele e Arancha Nogueira veñen de publicar en redes 'Se vas estar aquí', unha canción que mestura os versos da poeta coas melodías do músico e youtubeiro. O resultado é unha proposta innovadora, nunca antes formulada, e que non deixa de sumar reproducións do YouTube. Sabela Souto e Afra Torrado foron as encargadas do videoclip.
Conta o Aquele que cando se coñeceron Arancha mais el axiña se decataron de que tiñan que facer algo xuntos. Non sabían o que, pero estaban seguros que a mestura había funcionar. Aos poucos foron perfilando a idea e hai dous meses comezaron a compoñer esta canción. "Paseille a Arancha unhas bases e unhas letras e aos dez minutos xa me estaba enviando a poesía!", di o Aquele ao teléfono.
"Estamos moi contentos porque cremos que é algo que non existía". A acollida polo de agora está sendo moi boa e o público entrégase cada vez máis a estes novos proxectos musicais en galego que comezan a coller forza. "Por fin a música en galego non se resume a heteros con camisetas negras facendo punk!", exclama o youtubeiro. "Estamos perdendo o complexo a sacar o que temos feito no noso ordenador, e iso está ben. A partir de aí, xa se irá traballando".
Ao mesmo tempo, o Aquele tamén apela a abrir o campo de visión e facer contidos de todo tipo no noso idioma, máis alá da canción protesta: "Non por ser en galego ten que ser reivindicativo". Polo que observa, a xente comeza a animarse e non son poucos xa os que nutren de novos sons e novas temáticas as nosas listas de reprodución.
De cara ao futuro, adianta que ten un par de cousiñas máis e que este proxecto non vai quedar aquí. "Cremos que pode dar para máis". Abofé que si! Que soe!
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.