Pola defensa dun xornalismo en galego
Carballo acollerá este 7 de febreiro o Día dos Medios en Galego no que se reivindicará a importancia dos medios na nosa lingua.
Por Galicia Confidencial | Carballo | 29/01/2020 | Actualizada ás 21:00
A Asociación dos Medios en Galego (AMEGA) ,entidade da que forma parte Galicia Confidencial, volve celebrar este 7 de febreiro o Día dos Medios en Galego, unha xornada para revindicar a importancia da ter un xornalismo na lingua do país e que foi ratificada por unha declaración conxunta de todos os partidos con representación no Parlamento Galego no 2018.
A data quere lembrar a saída primeira publicación xornalística realizada integramente en galego, O Tío Marcos d’A Portela, editado en Ourense por Valentín lamas Carbajal en 1876.
Carballo acollerá este ano este evento no que se visibilizará a importancia e a necesidade de que os medios comuniquen na nosa lingua. Actualmente son un cento de edios (incluíndo revistas especializadas, tanto dixitais como impresas) as que contan en galego o que pasa no noso país.
A cita terá lugar o propio venres 7 de febreiro, a partir das 20:30h no Casino1889, unha entidade cultural centenaria, rexurdida pola mocidade carballesa neste último lustro. O acto será presentado, en clave regueifeira, por Lupe Blanco, estará amenizado por Avelino González, e contará coa participación de representantes da Secretaría Xeral de Política Lingüística, da Deputación da Coruña e do Concello de Carballo, colaboradores do evento.
Pechará o acto a banda muradá Terbutalina, cun concerto, rememorando aquela Gala de 2011 celebrada en Compostela onde a banda colaborara coa AMEGA no marco da campaña Vitaminas para o Galego.
