Manifestacións da CIG en defensa da industria e o emprego

Centos de persoas manifestáronse este xoves polas rúas das principais cidades galegas convocadas polo sindicato CIG en defensa do sector industrial e do emprego, e para esixir tanto ao Goberno central como á Xunta que tomen medidas para acabar coa precariedade.

En Vigo, a marcha partiu desde Vía Norte baixo unha persistente choiva e nela secretario comarcal do sindicato nacionalista, Alberto Gonçalves, subliñou que a CIG vai estar "co alento na caluga" do Goberno central para que "cumpra as promesas que fixo en campaña" con respecto á derrogación da reforma laboral.

Por outra banda, incidiu na necesidade de executar políticas industriais que dean resposta á crise que vive Galicia neste sector, e lembrou a situación das industrias electrointesivas, así como o que está a ocorrer co naval, que está "moribundo".

A ese respecto, Gonçalves responsabilizou a Xunta, que ten "plenas competencias en materia industrial", de permitir esa crise en sectores estratéxicos, e esixiu ao goberno galego "que cumpra as súas obrigas".

Ademais da marcha celebrada na cidade olívica, a CIG convocou manifestacións na Coruña, Santiago, Ferrol, Lugo, Ourense e Pontevedra, baixo o lema 'Recupera os dereitos para avanzar. En defensa da industria e o emprego'.

"EMERXENCIA SOCIAL"

O secretario xeral da CIG, Paulo Carril, proclamou que esta central non está "disposta a esperar que o Goberno español tome decisións como a recente suba do SMI ou a suba do 0,9 % das pensións, que en absoluto están á altura da emerxencia social que vive o país".

Así, advertiu de que é "urxente e necesaria a derrogación íntegra" das reformas laborais e de todas as políticas de recorte nos servizos públicos, porque esas "tímidas e insuficientes" medidas do Executivo non solucionan "a profunda inxustiza social" causada pola precariedade e a vulneración de dereitos laborais.

Con respecto á "crise industrial" en Galicia, Paulo Carril referiuse á situación de Alcoa en San Cibrao e á posición de "absoluta indefensión" dos seus traballadores ante "decisións de peche"; lembrou a crise do naval que "se estende desde Ferrol a Vigo"; e tamén o peche da central térmica das Pontes, "que se deixa á libre decisión de Endesa-Enel.

A todo iso, sumou o "permanente proceso de reconversión e expulsión do rural", os "salarios e pensións máis baixos do Estado", ou aos elevados índices de emigración dos galegos.

Finalmente, o secretario xeral da CIG denunciou a postura "ultraespañolista e negacionista de Galicia" do PP e do presidente Feijóo, ao que acusou de estar "entregado aos fondos de investimento". "Só recúa cando a mobilización social faille fronte, conseguindo impedir proxectos como o da mina de Touro ou o peche do paritorio de Verín", constatou.