O Sergas distribúe entre o seu persoal un protocolo de actuación se se sospeita dun caso de coronavirus

O Servizo Galego de Saúde (Sergas) distribuíu entre o seu persoal sanitario un protocolo de actuación en caso de detección dun caso sospeitoso de infección por coronavirus.

Neste documento establécese que serán casos posibles todos aqueles pacientes que teñan síntomas compatibles cunha infección respiratoria aguda, de calquera gravidade, e que presenten síntomas como tose ou dificultade para respirar.

Así mesmo, só se considerarán casos sospeitosos se nos últimos 14 días estiveron na provincia chinesa de Hubei ou estiveron en contacto estreito cunha persoa que se sospeita ou se confirmou que padece esta enfermidade.

Nese caso, o Sergas recomenda colocar inmediatamente unha máscara ao paciente e acompañalo a un lugar illado do centro, de modo que se evite que entre en contacto con outras pesonas. O persoal que o atenda, que evitará calquera intervención médica que non sexa estritamente necesaria, tamén se colocará unha máscara.

Tras iso, darase información ao Sistema de alerta epidemiolóxica de Galicia para que se aplique o protocolo de traslado a un centro hospitalario. O persoal sanitario debe manterse, no posible, afastado uns dous metros do paciente e, no caso de que sexa necesario exploralo, deberá utilizar un equipo de protección especial.