A enogastronomía como elemento dinamizador do rural en Xantar 2020
O Salón Internacional de Turismo Gastronómico, que se celebra en Ourense do 5 ao 9 de febreiro, é o único acreditado da Península Ibérica e chega á súa 21ª edición.
Por X.M. Fernández | Ourense | 04/02/2020 | Actualizada ás 20:50
Este ano un dos temas centrais do evento é poñer en valor o papel que xogan a gastronomía e o viño na dinamización das contornas rurais contribuíndo a fixar poboación e combater o reto demográfico.
Expourense converterase estes días no epicentro do turismo enogastronómico reunindo a 298 expositores e con 9 países representados; ademais de España, estarán Portugal, Costa Rica, Cabo Verde, México, Perú, Chile, Panamá e Arxentina.
No que respecta a actividades, Xantar trae a recoñecidos chefs de 6 dos países nomeados que impartirán obradoiros de cociña en directo enmarcados no XV Encontro Internacional de Gastronomía Saudable e Sostible que ofrecerá ao público asistente unhas 150 experiencias.
Outra novidade será a celebración, o xoves 6, da cuarta e derradeira semifinal do VIII Concurso Cociñeiro do Ano e do IV Concurso Camareiro do Ano. Oito cociñeiros e cinco camareiros de Galicia, Asturias, Cantabria, Euskadi, La Rioja e Navarra competirán por alcanza a final nacional que terá lugar o vindeiro mes de abril na Feira Alimentaria de Barcelona.
Esta importante cita gastronómica de referencia internacional apoia nesta edición a Candidatura da Ribeira Sacra a Patrimonio Mundial da Unesco.
As novidades do salón poden seguirse a través da web www.xantar.org ou das súas redes sociais www.facebook.com/Xantar; en twitter con @XANTAREXPO ou enInstagram a través de @xantaroficial.
