Sindicatos médicos reclaman á Xunta o pago das horas extra e a cotización das gardas para a xubilación
O dirixente de CESM, Ramón Barreiro, solicita que se aplique "un índice corrector de cara á xubilación", a modo do que se aplica a policías e bombeiros.
- Denuncian que o Sergas cobre as vacantes de pediatría da Costa da Morte con médicos de familia
- O paridoiro de Verín, aberto de novo: "Por fin volvemos á normalidade"
Por E.P. | SANTIAGO DE COMPOSTELA | 04/02/2020 | Actualizada ás 10:47
O presidente da Delegación da Confederación Española de Sindicatos Médicos (CESM) en Galicia, Ramón Barreiro, reclama ao conselleiro de Sanidade, Jesús Vázquez Almuiña, que se abonen ao persoal facultativo do Sergas as horas extra cando se produza un exceso de xornada, mesmo durante as gardas, en base a unha sentenza ditada recentemente polo Tribunal Supremo, que obriga as empresas do transporte sanitario en Cantabria ao pago das horas extra tamén nas gardas cando se excede a xornada laboral.
"O fallo da Sala 5ª do TJUE determina que o artigo 2 da Directiva 2003/88 debe interpretarse no sentido de que o tempo de garda que un traballador pasa no seu domicilio, coa obrigación de responder as convocatorias do seu empresario nun prazo de oito minutos, prazo que restrinxe considerablemente a posibilidade de realizar outras actividades, debe considerarse tempo de traballo", sinala nun comunicado o sindicato médico.
Respecto diso, Barreiro explica, no escrito remitido á Xunta, que a sentenza do TS "é a primeira na que un tribunal español aplica a resolución dos tribunais de xustiza europeos de 21 de febreiro de 2018", coñecida como 'Caso Matzak', que "considera que o tempo de garda dun traballador no marco das actividades que realiza para un empresario debe cualificarse como tempo de traballo", puntualiza.
CESM Galicia entende que con esta nova xurisprudencia "queda derrogado tácitamente o artigo 48.3 do Estatuto Marco do persoal estatutario dos servizos de saúde, e ábrese a porta a que a Administración aplique estes criterios para remunerar os facultativos como corresponde", destaca.
Na mesma misiva, o presidente deste sindicato médico demanda á Xunta que as gardas que realicen os médicos "computen para a cotización como tempo produtivo de cara á xubilación, xa que se trata dun traballo obrigatorio que supón un notable incremento da xornada laboral anual".
"Os facultativos -engade- realizamos unha media de entre 44 e 50 gardas ao ano de 17 e 24 horas, equivalentes a preto de 5 anos de traballo ao termo da vida laboral dun profesional, cinco anos polos que na actualidade non se cotiza", subliña CESM Galicia.
ÍNDICE CORRECTOR
Ademais, concreta que "se esas gardas se realizan en horario nocturno, estímase que un traballador envellece prematuramente cinco anos por cada 15 de traballo nocturno" e, ademais, abunda, "ten serias consecuencias para a saúde como o padecemento de hipertensión, alteracións dixestivas e trastornos do sono, entre outras".
Por todo iso, o dirixente sindical solicita que se aplique "un índice corrector de cara á xubilación", a modo do que se aplica a policías e bombeiros, polo que, matiza, "lles computase 1,1 e 1,2 anos, respectivamente por cada ano de traballo, o que permitiría que os médicos dispuxesen dunha xubilación flexible a partir dos 60 anos".
CESM Galicia expón por último que, a través da Federación Europea de Médicos Asalariados (FEMS), "xa se solicitou" ao Parlamento Europeo e a todas as institucións e gobernos dos países da UE "que se lles recoñeza o seu dereito a cotizar as gardas de 24 horas, algo que é de xustiza", sentenza.
