Por Europa Press / Redacción | MADRID | 05/02/2020 | Actualizada ás 11:15
A ministra de Facenda, María Jesús Montero, indicou este mércores que en 2020 xa non é posible aprobar a liquidación definitiva do IVE das comunidades autónomas de 2017, pero si se mostrou disposta a estudar "medidas paliativas" no seo do Consello de Política Fiscal e Financeira (CPFF), convocado para este venres.
Montero, en declaracións a Antena 3 recollidas por Europa Press, sinalou que é un "tema herdado" do exministro de Facenda Cristóbal Montoro e que o Goberno tratou de corrixilo nos Orzamentos de 2019, que o PP "tombou" a pesar de que agora "esixen arranxalo".
"En 2020 non é posible acometelo, o cal non quita que tomemos medidas paliativas", apuntou a ministra, que se queixou de que cando "se perpetran os feitos", ninguén di nada e cando se tenta arranxar é cando se expoñen as esixencias. "Tentamos arranxalo en 2019 e tombaron os Orzamentos, non pode ser que o PP esixa unha cousa e tombe o que permite arranxalo", engadiu.
Preguntada polas "ameazas" dalgunhas comunidades gobernadas polo PSOE como Aragón ou Castela-A Mancha de acudir aos tribunais se o Goberno non reparte os 2.500 millóns de euros do IVE de 2017, Montero sinalou que é "unha rocha para as ameazas" e que o Ministerio de Facenda "non pode responder a base de ameazas", senón con criterios "xustos" e que permitan asegurar que todas as comunidades teñen o mesmo trato.
"Non me sinto ameazada coa carta", afirmou a ministra, en referencia á misiva que este martes enviou o presidente de Aragón, Javier Lambán, dando ao Ministerio de Facenda un prazo de 15 días para solucionar este tema e o anuncio de "accións legais" en caso de non realizarse o pago neste tempo. "Cada un expresa a súa opinión como quere (...) e as comunidades teñen dereito a acudir onde queiran", precisou.
No caso de Galicia a Xunta xa anunciou a semana pasada que esgotará todas as posibilidades no ámbito xudicial e levará aos tribunais ao Executivo que dirixe o socialista Pedro Sánchez co fin de que pague a débeda de 200 millóns derivada da mensualidade do IVE de decembro de 2017.
TEMA NO CONGRESO
Pola súa banda, o PP defenderá o vindeiro martes ante o Pleno do Congreso a necesidade de contar cun novo sistema de financiamento autonómico e a devolución ás comunidades dos 2.500 millóns de euros pendentes de pago correspondentes á liquidación do IVE de 2017.
Así, segundo a orde do día do Pleno do próximo 11 de febreiro, ao que tivo acceso Europa Press, levará unha proposición non de lei na que esixe este pago ás comunidades e que o Goberno non dilate máis a reforma do financiamento autonómico e presente, xunto ao proxecto de Orzamentos Xerais do Estado para 2020, unha proposta baseada nos informes de expertos xa dispoñibles.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.