Ciudadanos suspende de militancia o seu único concelleiro en Pontevedra por apoiar os orzamentos de BNG e PSOE

Gregorio Revenga votou a favor do orzamento despois de que se aceptasen catro emendas presentadas por este edil, que rexeita "estratexias de despacho" e "guerras entre azuis e vermellos".

Por Europa Press / Redacción | PONTEVEDRA | 07/02/2020 | Actualizada ás 18:43

Comparte esta noticia

A Comisión de Réxime Disciplinario de Ciudadanos abriu un expediente disciplinario con suspensión cautelar de militancia ao seu único concelleiro no Concello de Pontevedra, Gregorio Revenga, despois de que este apoiase co seu voto a aprobación dos orzamentos municipais da capital provincial, gobernada por unha coalición formada por BNG e PSOE.

Gregorio Revenga
Gregorio Revenga | Fonte: Facebook.

A comisión adoptou a decisión "tras incumprir as directrices do partido, feitos que poderían infrinxir a normativa disciplinaria interna ao votar a favor os orzamentos de Pontevedra".

No pleno extraordinario celebrado este venres, o concelleiro Goyo Revenga votou a favor do orzamento presentado por nacionalistas e socialistas despois de que estes aceptasen catro emendas presentadas polo edil de Ciudadanos que, no seu conxunto, están valoradas en medio millón de euros.

Goyo Revenga enmarcou este acordo na súa estratexia de facer unha oposición "construtiva". Este mesmo venres, durante a súa intervención no pleno, Goyo Revenga asegurou que el quere "facer política coa razón e non coas vísceras" e que está "para resolver problemas e non para crealos".

Entre as emendas aceptadas polo goberno municipal está a reforma da unidade de condutas adictivas do municipio, que, como denunciara Revenga, atópase nunhas condicións "deplorables e indignas".

O edil de Ciudadanos tamén pactou que se incremente "no que sexa necesario" a partida de limpeza de centros públicos de ensino infantil e primario, para dar un servizo adecuado, así como a mellora das condicións de traballo das empregadas.

Por último, o acordo con Ciudadanos inclúe a instalación de desfibriladores en todas as áreas deportivas e casas de cultura do municipio e o incremento de 200.000 euros para a mellora e mantemento dos parques infantís municipais.

A Comisión de Réxime Disciplinario de Ciudadanos lembra que abre un expediente disciplinario ao concelleiro pontevedrés "de acordo ao respecto dos principios e valores do partido, e así como á aplicación das normas estatutarias".

RESPOSTA DE REVENGA

Revenga manifestou que Ciudadanos "naceu como un proxecto liberal e de centro, para servir aos intereses e necesidades das persoas, non das guerras entre azuis e vermellos". "E aí estou eu", apostilou.

O edil declarouse convencido de que os pontevedreses que apoiaron a Cs nas urnas fixérono para que os seus representantes aproveiten a súa "pouca ou moita capacidade de influencia" en mellorar a súa cidade. "E iso fixemos", defendeu.

Así as cousas, Revenga subliñou que, "grazas a estas emendas", os pontevedreses "hoxe teñen medio millón de euros máis nos orzamentos" para mellorar os parques infantís, dotar de desfibriladores ás instalacións municipais ou arrombar o centro da Unidade de Condutas Adictivas. "Ademais, as nenas e nenos de Pontevedra terán escolas máis limpas e o persoal de limpeza, melloras laborais", engadiu.

Finalmente, o concelleiro pontevedrés asegura que "igual algúns verían máis rendible sumarse ao 'non' a todo", pero advertiu: "Entre as estratexias de despacho e as persoas, eu e Cs de Pontevedra, elixiremos sempre as persoas".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 8 comentarios

6 Gamela

Por pouco que sexa fixo máis pola xente este edil que toda a tropa que durme no Concello de Vigo á sombra de Abel Caballero aplaudindo os actos electorais da Carmela Silva !

1 Sentidiño

Non penso. Pero é o certo que o asunto do PassVigo é impropio do pensamento de esquerdas. Supremacismo vigués.

5 Xesús Ateo Recalcitrante

A nova Falange Española de las JONS, que rula baixo a denominación de Ciudadanos, volve á carga; xa non respecta nin aos seus propios membros destacados. O único que lles vale é facer o seu papel de extrema dereita para ser ben acollidos dentro do Partido Phranquista onde poden disimular (como antes xa fixeron os hoxe VOX) con facilidade o que realmente son. Eu síntoo polos incautos que aínda seguen dentro do partido do Falangito sen decatarse de que os teñen como meros comparsas.

4 Neno dos Peares

O partido do Ibex 35, of course.

1 MarianoJR

Tes razón...

3 mirko

Eso é. Ben dito.Apoio.

2 Sentidiño

Urkullu vai convocar en abril para aproveitar a marea da final vasca da copa do borbón de fútbol...