A manifestación do mércores pedirá en Santiago o "peche das casas de apostas" xa que "non son unha opción de lecer digno"

Integrantes da plataforma Compostela Sen Apostas presentaron este luns a manifestación que o vindeiro mércores acollerá a Alameda de Santiago para reclamar o "peche das casas de apostas" e a "prohibición do xogo en liña", así como unha alternativa de "lecer digno" para os mozos.

A cita será ás 20:30 horas do próximo mércores na Alameda de Santiago, onde os convocantes buscan "denunciar a expansión deste negocio que está a levar á ruína aos mozos". "Ofrécenlles, sabendo que é mentira, grandes sumas de diñeiro", explicaron os integrantes da plataforma, para quen esta "non é unha opción de lecer digno".

En particular, denunciaron as estratexias publicitarias, nas que se empregan xogadores de fútbol ou persoas coñecidas para atraer clientes e "normalizar" esta actividade e, nesta liña, viron positivas as restricións á publicidade destes establecementos anunciadas polo ministro de Consumo, Alberto Garzón.

Afirmaron que non se tratan de pasos "definitivos", que deberían pasar polo peche de todas as casas de apostas e a prohibición do xogo en liña. Este tipo de industria, criticaron, mete ao usuario nun ciclo do que "é moi difícil saír" e que o conduce "á pobreza". "É un modelo de negocio sostido na dependencia, que destrúe ás familias e ás persoas", resolveron.

Para finalizar, incidiron en que se trata dun sector "moi propicio para o machismo", no que a figura da muller emprégase "como un elemento de atractivo e un obxecto de consumo máis" para atraer a clientes masculinos. Por ese mesmo motivo, destacaron, tamén ás mulleres con problemas de ludopatía cústalles máis requirir axuda.

📣📆 #19F #Compostela | Manifestación contra as casas de apostas.

📌 Alameda.

🕰️ 20:30h.

Convoca @senapostas. pic.twitter.com/c2esLOzgD0

— Convocatorias Galiza 📣 (@ConvocatoriasGz) February 17, 2020