A Xunta acorda con empresas as alegacións ao estatuto das electrointensivas
Conde destaca a "unidade de acción" para que haxa unha "rectificación" do Goberno.
Por E.P. | SANTIAGO DE COMPOSTELA | 18/02/2020 | Actualizada ás 15:36
O conselleiro de Economía, Francisco Conde, reuniuse este martes con representantes da industria galega para acordar alegacións a presentar ante o Goberno central antes do xoves ao estatuto das empresas electrointensivas.
En declaracións aos medios tras o encontro en Santiago, Conde avisa de que hai unha "unidade clara" en Galicia fronte a este estatuto, xa que o Goberno "está a utilizar a política enerxética como un instrumento de discriminación territorial".
Respecto diso, sostén que neste estatuto "hai comunidades autónomas que se ven beneficiadas por ese incremento de 119 empresas a máis de 600 que poden entrar no sistema", entre as que cita "País Vasco e Cataluña", mentres "deixan fóra empresas que están situadas" en Galicia.
Carga contra que as empresas que "máis axudan necesitan reciben menos e ábrese a máis de 450 empresas que antes non estaban no sistema de consumidores electrointensivos para que se poidan beneficiar".
O sector electrointensivo conta con 5.000 empregos directos en Galicia que están "ameazados" por "unha decisión" do Goberno de presentar un estatuto que "non responde as necesidades que teñen as empresas", dado que "non establece un prezo competitivo" para "estar en igualdade de condicións" que o resto de países europeos.
Todo iso, mentres o Goberno galego traballa nunha fronte común con Asturias e Cantabria en defensa da viabilidade das empresas electrointensivas.
ALEGACIÓNS "PREVISIBLES"
Sobre as alegacións ao estatuto, a Xunta indicou que serán "previsibles" e "realistas" en liña coas xa remitidas por primeira vez en marzo de 2019. Entre elas, demándase a creación da figura de hiperelectrointensivas, compensacións fiscais e descontos ata o máximo permitido no pago das peaxes eléctricas.
E é que Conde lembra que países como Francia crearon a figura de consumidores hiperelectrointensivos, polo que empraza a que haxa esta mesma "caracterización" en España.
Censura que o Executivo de Pedro Sánchez "está a dicirlle un non á industria electrointensiva". Opina que "non se trata de ter un estatuto", senón de ter medidas fiscais e que haxa unha poxa de interrumpibilidade que permita un prezo "competitivo".
De tal forma, Francisco Conde empraza o Executivo central a unha "rectificación" porque o borrador pon as empresas "nunha situación peor que o punto de partida", pois "nestes momentos fai inviable a continuidade de empresas como pode ser Alcoa San Cibrao".
