Por E.P. | A CORUÑA | 18/02/2020 | Actualizada ás 17:03
O maxistrado da Sala do Social do Tribunal Superior de Xustiza de Galicia (TSXG) José Fernando Lousada Arochena presentou este martes na Coruña a súa obra 'El enjuiciamiento de género', no que analiza a influencia dos estereotipos de xénero na Xustiza.
O libro, que foi presentado no Palacio de Xustiza, analiza a parcialidade que levan os prexuízos de xénero e avoga por aplicar e interpretar as normas xurídicas de acordo co denominado enxuizamento de xénero.
Esta metodoloxía, segundo explica o autor, pretende unha maior igualdade efectiva entre os sexos e constitúe "un instrumento necesario para conseguir a imparcialidade en todas as decisións xudiciais".
Na presentación, o maxistrado indicou que a influencia dos estereotipos de xénero na xustiza leva a que en moitos casos, como o de 'La Manada', "en lugar de axuizar os feitos, valórase a conduta da vítima".
Entre os estereotipos nocivos, segundo resalta o maxistrado, atópanse "actitudes como o non valorar obxectivamente o testemuño dunha muller baseándose en que tardou en denunciar, na súa maneira de comportarse ou na súa imposibilidade de recrear os feitos ao detalle"; non contratar ou despedir a unha traballadora por razón do seu embarazo, maternidade ou por atoparse en idade fértil; ou negar a existencia de agresión sexual cando non se manifestou unha negativa rotunda, engade.
A "CAPACITACIÓN" PARA ELIMINAR PREXUÍZOS
"No momento que os operadores xurídicos inclúen o prexuízo vai haber discriminación", comentou o autor deste libro, quen considera que a eliminación dos prexuízos pasa pola "capacitación" dos operadores xurídicos. Desta forma, di, "non se xulgaría de maneira nesgada".
"Axuizar sen prexuízo é axuizar en igualdade", concluíu este autor, licenciado e doutor en Dereito, graduado social, diplomado en Práctica Xurídica, avogado fiscal excedente e maxistrado especialista da orde Social destinado no TSXG.
Na presentación, este maxistrado estivo acompañado, entre outros, do presidente do TSXG, José María Gómez y Díaz-Castroverde, e da secretaria xeral de Igualdade, Susana López Abella. Esta última ve "imprescindible" este libro, que se converterá nun "referente" para lexislar en igualdade. "É un instrumento para conseguir a imparcialidade na xustiza", engadiu engade.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.