Por E.P. | SANTIAGO DE COMPOSTELA | 19/02/2020 | Actualizada ás 16:09
A Xunta concede unha prórroga na data do desaloxo aos afectados polas expropiacións do Hospital Montecelo, en Pontevedra, explicou o vicepresidente galego, Alfonso Rueda.
O vicepresidente da Xunta, acompañado do delegado territorial en Pontevedra, José Manuel Cores Tourís, reuniuse este mércores coas cinco familias afectadas polas expropiacións para as obras do Hospital Gran Montecelo e concedeulles unha prórroga na data do desaloxo.
O encontro produciuse na Delegación Territorial da Xunta en Pontevedra e á súa conclusión o vicepresidente explicou que, unha vez que se chegou a un acordo no prezo, os afectados pedíranlle "permanecer o máximo tempo posible nas súas propiedades" ata que atopen unha nova localización.
Estes afectados xa gozaban unha prórroga inicial respecto ao prazo no que tiñan que deixar as súas casas e negocios que vencía o próximo 28 de febreiro e agora a Xunta concédelles un novo prazo, segundo confirmou Rueda.
"Hai que porse na pel e na situación das persoas que foron expropiadas", sinalou o vicepresidente. "Dentro do inevitable que é esta actuación administrativa hai que darlles as máximas facilidades posibles", engadiu.
Alfonso Rueda anunciou que o próximo mes de marzo sairá publicada a licitación da obra do Gran Montecelo e mantéñense os prazos de adxudicación neste primeiro semestre do ano. Por tanto, no acordo cos afectados que serán expropiados "o que tentamos é ir ata o límite deses prazos onde vai ser necesario dispor das edificacións", indicou. Esa data tope para que se produza o desaloxo é o 15 de xuño.
A portavoz das familias afectadas polas expropiacións forzosas dixo que están "satisfeitos" co prazo que lles deron. "Co que non estamos de acordo é co prezo que estableceu a Xunta de maneira unilateral" en pago polos seus negocios e vivendas, sinalou. Esta reclamación levárona ao tribunal do xustiprezo. "E esperamos que atendan as nosas razóns, senón iremos ao Tribunal Superior de Xustiza de Galicia", apostilou.
Tamén expresaron o seu malestar por ter que asumir o pago dos impostos. "É absurdo, danche un diñeiro para reporche o ben que che levan e, doutra banda, Facenda reclámache coma se tiveses un ingreso extraordinario", concluíu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.