As dúas mareas afíns a Anova apostan por un acordo con Unidas Podemos aínda quen sen concretar condicións
Compostela Aberta e Marea Atlántica aproban un documento moi aberto que apoia "unha candidatura galega de unidade popular" sen especificar nin o peso, nin a importancia que estas mareas ou Anova terán nese espazo. Desde Podemos dan xa por feito o acordo.
- A renuncia de Luís Villares descobre as estratexas da nova política que xoga a ser como a vella política
- Anova e Podemos afrouxan tensión pero seguen sen chegar a un acordo
Por Europa Press / Redacción | SANTIAGO DE COMPOSTELA | 20/02/2020 | Actualizada ás 22:31
As asembleas de Compostela Aberta e Marea Atlántica,mareas afíns e con forte participación de Anova, aprobaron este xoves senllos textos nos que se avalan impulsar unha candidatura de unidade popular, que, aínda que sen especificar siglas, apuntan a Unidas Podemos.
Concretamente, a asemblea de Compostela Aberta, da que é portavoz Martiño Noriega, que á súa vez é o responsable das negociacións de Anova, deu decidido "apoiar e implicarse" nunha candidatura galega de unidade popular. Iso si, que sexa "representativa do conxunto do espazo" e na que se "garantan vías" para a súa participación no proceso electoral de próximo 5 de abril.
En todo caso, a resolución acordada non se pecha a ningún escenario final e ten un segundo punto no que, no caso de que a candidatura de unidade "non sexa viable", está previsto reunir de urxencia de novo á asemblea para decidir o "nivel de implicación da organización nas eleccións" autonómicas de abril.
A proposta, segundo fontes da asemblea cidadá consultadas por Europa Press, saíu adiante por unanimidade e asentimento do medio cento de persoas que acudiron a este encontro a apenas 24 horas de que se peche o prazo para a inscrición de coalicións electorais.
A Rede de Marea Atlántica, sinala o seu texto, "aposta por participar nunha candidatura galega de unidade popular representativa do conxunto do espazo de cambio e na que se garanta unha representación suficiente do municipalismo" e da coruñesa, cuxo referente político foi o exalcalde Xulio Ferreiro, en particular.
Ademais, o acordo, ao que tivo acceso Europa Press, apunta que a Rede de Marea Atlántica volverase a reunir este venres para, ou ben informar de se hai un acordo de candidatura ou, de non habelo, decidir a participación nas eleccións do 5 de abril.
Os acordos de ambas as asembleas municipalistas tradúcense nun pulo a Podemos e Anova para que frutifique unha candidatura na que, ademais da formación morada e Esquerda Unida, estean presentes tamén as mareas municipalistas, singularmente a compostelá e coruñesa, pero tamén outras máis pequenas e que manteñen gobernos en municipios máis pequenos.
CONVERSACIÓNS INTENSIFICADAS
Nas últimas horas intensificáronse as conversacións, teléfonicas e con encontros de varias horas, entre os referentes de Podemos e Anova, Antón Gómez-Reino, que se perfila como candidato á Xunta desta confluencia, e Martiño Noriega, respectivamente.
Se hai unha semana as posturas estaban máis afastadas, os acontecementos que se sucederon despois de que Gómez-Reino anunciase que se presentaba ás primarias de Podemos Galicia para ser candidato á Xunta, sen deixar o escano no Congreso, tiveron un xiro nos últimos días.
De feito, Anova pasou de criticar duramente as condicións impostas por Podemos a ser moi receptivo a elas. As duras críticas de Martiño Noriega ao partido morado o pasado domingo quedaron en nada tras as converas que mantivo con Gómez-Reino nos últimos días. De feito, desde Podemos dan xa por feito que haberá acordo con estas dúas mareas e con Anova, aínda que baixo as súas condicións.
