Por E.P. | SANTIAGO DE COMPOSTELA | 21/02/2020 | Actualizada ás 20:35
O secretario provincial do PSOE de Pontevedra, David Regades, asegurou que "o mellor que lle pode pasar" aos veciños de calquera pobo da provincia é que o candidato do PSdeG á Xunta, Gonzalo Caballero, sexa o próximo presidente.
Regades pronunciouse deste xeito con motivo da reunión do comité executivo provincial do partido para aprobar o calendario de elaboración da candidatura pontevedresa, que encabezará o propio aspirante á Xunta.
En consonancia co cronograma aprobado pola dirección do PSdeG, os socialistas celebrarán as súas asembleas locais na provincia entre os días 22 e 25, nas que poderán postularse os militantes. Tras iso, o día 26, a comisión executiva provincial fará a súa proposta. E ao día 27, a executiva galega fará o propio coas listas do catro provincias galegas para que, finalmente, sexan aprobadas pola dirección federal o próximo día 28.
"Estamos preparados para gobernar Galicia, e a provincia de Pontevedra volverá facer a súa achega converténdose de novo no celeiro de votos do PSdeG", sinala Regades, que ve necesaria unha Xunta que "deixe atrás a crispación constante e a confrontación partidista" cos gobernos locais, provinciais e do Estado.
Ademais, Regades comprometeu a súa implicación persoal "ao 200% para volver gastar as zapatillas" nunha campaña pegada ao territorio e próxima á cidadanía.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.