CxG rexistra unha nova coalición tras fracasar o acordo co BNG aos que cualifica agora de "comunistas"
A formación de Xoán Carlos Piñeiro decidira integrarse nas listas do BNG nas pasadas xerais. Agora asina a coalición Nós-Galeguistas para ir co Partido Galeguista.
Por Galicia Confidencial | Santiago de Compostela | 24/02/2020 | Actualizada ás 21:00
Compromiso por Galicia pasou dun trato idílico co BNG a case insultalos. O secretario xeral de Compromiso por Galicia (CxG), Xoán Carlos Piñeiro, acusou ao Bloque de impedir unha nova alianza e acusounos de ser "comunistas". Por iso, e tras non fructificar unha alianza por posicións de máximos “dos interlocutores", CxG optou por presentarse co Partido Galeguista dentro da coalición Nós-Galeguistas.
“Estamos esperando adhesións e dependendo de como vaian ditas adhesións, poderemos sufrir algún cambio no nome da coalición, depende da Mesa Electoral” di Piñeiro. A coalición Nós-Galeguistas, está rexistrada por un partido, Vía Nova, que está dentro de CxG.
“Estivemos falando con Coalición Galega, co Partido Galeguista e de momento só hai conversas, non coñecemos como iremos finalmente, se non progresa a idea de coalición, iremos como CxG” aclara Xoán Carlos Piñeiro.
Nun comunicado de Compromiso anunciando a coalición, declaran que o obxectivo político deste proxecto “é aglutinar aquelas persoas que acreditan na capacidade autogoberno de Galicia e non se senten representados polas forza de esquerda e comunistas”. Piñeiro declara sobre este punto que todo o mundo está por construir un espazo en Galicia que sexa un “soberanismo moderado”.
O BNG NON QUIXO DAR UN POSTO DE SAÍDA
Sobre a non concorrencia de CxG co BNG, como nas eleccións do 10N, Piñeiro aclara que “nestas eleccións do 5A xogabamos na casa e reclamamos ao Bloque ter dentro do seu grupo un representante de Compromiso no Parlamento galego”. Piñeiro afirma que isto sería sempre dentro da lealdade e respecto ao grupo parlamentar. “O BNG ofreceu postos tetemuñais nas listas do 5A e iso non é o que quería a nosa organización”.
Preguntado sobre se a non presentación de En Marea implicará que CxG ocupe o seu espectro electoral, o secretario xeral do partido galeguista declara que non buscan substituir a En Marea. “Nós somos un partido cunha estructura e a nosa idea é presentar esta ferramenta de coalición para que, quen queira, se sume en positivo”.
