SOS Sanidade Pública: "Seguen as consultas masificadas, escaso tempo por pacientes e atrasos nas citas"

A Plataforma SOS Sanidade Pública chama aos cidadáns e ao persoal sanitario a participar de novo este xoves, ás 12,00 horas, nas concentracións convocadas nos centros de saúde en defensa da mellora da Atención Primaria.

Segundo sinalou SOS Sanidade Pública nun comunicado, "a pesar da propaganda despregada pola Administración sanitaria galega seguen case intactos os problemas da Atención Primaria".

Respecto diso, denuncia que os centros de saúde "seguen sometidos aos burócratas das xerencias hospitalaria" xa que, concreta, "as novas direccións de Atención Primaria son un engano". Ademais, esta plataforma considera que "o orzamento deste nivel asistencial segue sendo absolutamente insuficiente para atender as necesidades de saúde da poboación".

Ademais, insiste en que "falta persoal médico, de enfermaría, administrativo, fisioterapia, psicoloxía clínica, logopedia, traballo social, farmacia clínica ou traballo social". "Os aumentos previstos son absolutamente insuficientes e a súa contía enganosa", concreta.

Para SOS Sanidade pública esta situación "tradúcese en consultas masificadas, de escaso tempo por pacientes e atrasos nas citas nos centros de saúde cada vez máis elevadas". Tamén asegura que "segue as trabas de acceso a recursos diagnósticos" e "o equipamento dos centros é insuficiente", engade e denuncia que o persoal "continúa traballando nunhas condicións laborais precarias con contratos lixo".

Para esta plataforma as negociacións para cambiar a Atención Primaria "volven ser un engano do Sergas para gañar tempo e desmobilizar ao sector". "Só coa mobilización continuada dunha alianza da poboación, co persoal sanitario de todas as categorías, sindicatos e organizacións progresistas, pode pór fin a esta inaceptable situación", conclúe.

CIG e SOS Sanidade Pública | Fonte: ASOCIACIÓN GALEGA EN DEFENSA DÁ SANIDADE PÚBLICA