Cultura e 11 municipios do Camiño Francés acordan avanzar na mellora paisaxística e dinamización da ruta

O conselleiro de Cultura, Román Rodríguez, asinou este mércores un acordo cos 11 concellos do Camiño Francés para avanzar na mellora paisaxística e na dinamización desta ruta, que concentra seis de cada 10 peregrinos, un convenio no que se investirá máis dun millón de euros.

Tras a firma, Román Rodríguez destacou a importancia de impulsar o coidado desta ruta, especialmente potenciando a súa sustentabilidade paisaxística, etnográfica e patrimonial. Explicou que o respecto e coidado do medio ambiente na Ruta Xacobea é un dos obxectivos do Plan Estratéxico do Xacobeo 2021 e do avance da programación deste evento. De feito, esta acción enmárcase na actividade Camiño Sustentable, que busca desenvolver políticas enfocadas ao coidado e preservación das diferentes rutas.

Entre as accións que levarán a cabo, figuran iniciativas de mellora paisaxística e embelecemento de recursos situados neste itinerario, accións de valorización, consolidación ou restauración de bens que integran o patrimonio etnográfico. Ademais, traballarase na supresión de elementos en desuso ou abandonados.

A maiores, permitirá desenvolver actividades culturais e turísticas que favorezan a promoción do Xacobeo 21, como a contratación dun técnico que traballe na uniformización das ordenanzas locais que regulan asuntos como a venda ambulante, o embelecemento ou a sinalización ao longo do Camiño.

No ámbito turístico e de promoción, desenvolveranse actuacións como a posta en marcha dun destino que opte ao recoñecemento de calidade turística Sictec e levarán a cabo acciones anuais de promoción do Ano Santo, que se executarán de forma conxunta cos 11 municipios deste itinerario.

A conselleira de Infraestruturas, Ethel Vázquez, no inicio de obras de acondicionamento do acceso do Camiño Francés a Santiago