Feijóo: "Non me presento como salvador da patria"

O candidato do PPdeG á reelección á Presidencia da Xunta, Alberto Núñez Feijóo, dixo que a súa "primeira obrigación" como  presidente autonómico é "tentar mellorar os servizos públicos". "E tentámolo cumprir", manifestou.

Nun coñecido hotel da cidade herculina, o candidato á reelección avanzou a súa intención de manterse á fronte da Xunta: "Non me presento como salvador da patria, preséntome para dicir que estou a disposición da cidade e de vostedes (aos asistentes)".

Por iso, e como está xa facendo os últimos días desde que anunciou o adianto electoral comprometeuse a licitar este ano 2020 o primeiro edificio do novo Hospital da Coruña. Unha infraestrutura que, cun investimento de 395 millóns de euros, converterase en "o maior investimento nos últimos 50 anos na Coruña".

"Hoxe esta cidade, na miña opinión, ten máis servizos públicos, máis oportunidade e máis prestacións das que tivo nunca", dixo, ao tempo que quixo defender a sanidade. "É un servizo público fundamental".