Por Galicia Confidencial | SANTIAGO DE COMPOSTELA | 02/03/2020 | Actualizada ás 13:11
A situación da muller no mercado laboral é un reflexo fiel da sociedade patriarcal da que aínda non fomos quen de saír. "Os avances son cativos, persisten as brechas de xénero, a segregación, a temporalidade e a baixa corresponsabilidade". Dende Comisións Obreira (CC.OO.) debuxan o panorama sociolaboral das mulleres en Galicia a través do informe 'Mercado de traballo e coidados: a dobre xornada das mulleres galegas' que veñen de presentar na mañá deste luns.
ASUMIR OS COIDADOS FAMILIARES
Camiño deste 8 de marzo, dedicado a poñer en valor o labor fundamental das mulleres coidadoras, CC.OO. centrou a meirande parte do seu estudo na "corresponsabilidade" e nas repercusións que os coidados teñen sobre a poboación feminina, un traballo "non remunerado" e que segue "invisibilidado". A "pegada do patriarcado" na estrutura laboral deixa datos moi significativos: o 72% das persoas inactivas en Galicia son mulleres, e delas, o 90% asume os coidados familiares.
Xa que logo, unha das causas fundamentais polas que as mulleres non entran no mercado laboral ou saen del é a "imposición ou autoimposición" dos coidados alleos: "Somos as mulleres quen renunciamos ás carreiras profesionais e á cotización para unha futura pensión en favor do coidado de dependentes e familiares. É moi típico o caso de mulleres que deixan de traballar ou traballan a xornada parcial porque están coidando dos sogros, non dos pais, dos sogros", afirma a secretaria de Muller e Igualdade de CC.OO., Mamen Sabio. O feito de que os salarios femininos sexan menores incide en que, á hora de escoller quen debe renunciar ao seu traballo remunerado para coidar dalgún familiar, as mulleres resulten as máis prexudicadas.
De novo, os datos falan por si sós. Fronte a 4.500 homes, 32.700 mulleres están inactivas pola necesidade de coidar de persoas enfermas, discapacitadas, maiores e crianzas. Ademais, son as mulleres as que máis fan uso das excedencias no traballo, un 92%. "Os homs cóllenas de maneira moi residual", comenta Sabio. Tamén é habitual que as mulleres reduzan a súa xornada laboral para dar resposta a estoutras obrigas privadas. "A elección da xornada parcial non é voluntaria, vén dada por unha estrutura patriarcal que nos asigna o rol de coidadoras", reafirma a secretaria de Muller e Igualdade.
TRABALLO NON REMUNERADO
Enriba da mesa tamén se puxeron os resultados doutro informe, Donantes de Tempo, elaborado pola USC a través de datos da EPA, que destaca que se os coidados fosen remunerados, o PIB incrementaría nun 51%. Sabio fai seu, xa que logo, un dos lemas fundamentais que se berra dende o movemento feminista: "Queremos emprego, traballo xa temos".
En canto á temporalidade nos empregos, CC.OO. advirte unha "mesma tesitura desigual". Tamén na fenda salarial, que segue en 5.488 euros, un 29%. No relativo ao desempreso, as mulleres levan igualmente o peor dato: un 13% fronte a un 10% dos homes. Os roles tradicionais de xénero mantéñense: na industria o 71% das persoas empregadas son homes, e na construción, a cifra elévase ao 91,4%. Do outro lado, os datos revelan unha gran feminización nos traballos relacionados cos servizos e adminitración.
"Este informe é un debuxo claro da segregación do mercado laboral. Temos que repensar o futuro e revalorizar os traballos que desempeñan as mulleres", sentenzan dende CC.OO. "Queremos unha igualdade real, non en papel".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.