Pontón ve ao BNG "con forza para dar un gran salto adiante": "estamos fortes e non porque o digan enquisas"
Insistiu en que observa unha "gran corrente de "simpatía" na rúa que pide "un cambio".
Por Europa Press / Redacción | SANTIAGO DE COMPOSTELA | 02/03/2020 | Actualizada ás 13:49
A portavoz nacional do BNG e cabeza de lista nas galegas, Ana Pontón, manifestou que os nacionalistas ven "con forza para dar un gran salto adiante" nas eleccións do próximo 5 de abril.
"Vémonos con forza para dar o gran salto adiante e que o fagamos pondo a unha presidenta; imos a por todas, sentimos fortes, non porque o digan as enquisas, senón porque hai unha gran corrente de simpatía ao BNG", sinalou.
Díxoo a preguntas dos xornalistas nunha presentación da cabeza de lista do catro provincias, o día en que se pecha o prazo para rexistrar as candidaturas ante a xunta electoral. Iso si, advertiu de que a "enquisa que vale" é a do 5 de abril, pero insistiu en que observa unha "gran" corrente de "simpatía" na rúa que pide "un cambio".
Pontón defendeu que se presenta para lograr un "cambio real" na Xunta e que os nacionalistas "ven con forza" para que se consiga. "Hai cansazo e unha maioría que quere cambio", incidiu Pontón. Contrapón seguir cunha "maioría absolutista" do PP a unha "Galicia viva, de cores, con optimismo e esperanza".
"Hai unha maioría de galegos que comparten connosco un desexo de que este país estea gobernado desde nós, desde aquí, que non acepte ordes nin de Madrid, nin desde Ferraz, nin Xénova nin da Complutense", aseverou Pontón, quen puxo os exemplos de Irlanda e Escocia, gobernadas por mulleres, ou País Vasco, cun goberno nacionalista.
