Por E.P. | SANTIAGO DE COMPOSTELA | 02/03/2020 | Actualizada ás 16:10
O vindeiro domingo terá lugar en Pontevedra unha manifestación convocada pola rede Galegas 8-M con motivo do 8 de marzo, Día Internacional da Muller. A marcha terá como lema 'Sen coidados non hai vida' e sairá, a partir das 17,30 horas, da Praza do Hospital para percorrer o centro da cidade.
Lupe Solla, Cecilia Tarela, Diana Rodríguez e Celia Balboa, representantes de Galegas 8-M, ofreceron este luns unha rolda de prensa en Pontevedra para anunciar os detalles da mobilización e fixeron unha chamada á cidadanía para participar neste acto.
Este ano 2020 a mobilización pon no centro das reivindicacións aos coidados tratando de visibilizar que esta responsabilidade estatisticamente recae, sobre todo, en mulleres e que a maior parte destes traballos se realizan sen remuneración ningunha. Ademais, apuntan que cando estes traballos son remunerados realízanse en condicións de precariedade e son infravalorados, tanto social como economicamente.
Diana Rodríguez lamentou que, en Pontevedra, a organización se atopou cunha actividade que conta coa colaboración do Concello e a Deputación, a carreira do Tour Universo Muller, que obrigou a trasladar a manifestación reivindicativa á tarde do domingo. "O 8M ten un significado que non é festivo", apuntan por parte da plataforma Galegas 8M, que sinala que para este tipo de actividades, que son positivas para o dinamismo económico, hai outras datas ao longo do ano.
MALESTAR
A preguntas dos medios de comunicación, a concelleira de Igualdade do Concello de Pontevedra, Paloma Castro, admitiu ser coñecedora do malestar dos colectivos feministas e asegurou que entende a súa postura.
"Respecteina desde o primeiro momento", afirmou, para desmarcarse de toda responsabilidades neste tema ao indicar que a carreira Tour Universo Muller organízase por parte da Concellaría de Deportes, que dirixe o tamén socialista Tino Fernández. "Eu non intervín para nada", concluíu.
Galegas 8M tamén reprocha á concelleira pontevedresa que cando solicitaron axuda á Concellaría de Igualdade para contratar un autobús que trasladase aos colectivos á manifestación feminista de Verín, a responsable do departamento, Paloma Castro, preguntou quen ía ler o comunicado e que se dicía neste documento. "Non é normal", critican e consideran que, detrás destas actitudes, móstrase que ao PSOE non lles gusta a crítica do movemento feminista cando afirma que o Goberno de Pedro Sánchez "non está a facer nada" neste ámbito.
Neste sentido, sinalaron que tampouco a Subdelegación do Goberno lles comunicou a autorización da marcha prevista para o domingo 8 de marzo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.