Feijóo alerta: "Sen fondos europeos, en Galicia non chegamos a fin de mes"

Insta os eurodeputados 'populares' Millán Mon, Zoido e Dolors Montserrat a "defender a pesca e a agricultura galegas".

Por Europa Press / Redacción | Marín | 03/03/2020 | Actualizada ás 17:53

Comparte esta noticia

O presidente da Xunta e candidato á reelección polo PPdeG, Alberto Núñez Feijóo asegurou, alertou este martes das dificultades que suporía para Galicia unha caída abrupta dos fondos europeos no novo período 2021-2027.

O candidato do PPdeG á reelección, Alberto Núñez Feijóo, nun acto en Marín
O candidato do PPdeG á reelección, Alberto Núñez Feijóo, nun acto en Marín | Fonte: Europa Press

"Sen fondos europeos, en Galicia non chegamos a fin de mes. Sen os fondos europeos non imos poder xestionar a comunidade autónoma. Hai tempo que non nos xogabamos tanto", sinalou Feijóo, nun acto organizado polo PP este martes en Marín co título xenérico de 'Falemos de Europa, falemos de Galicia'.

Neste acto, que tivo lugar na Biblioteca Municipal, interviñeron, entre outros, os eurodeputados do PP Francisco Millán Mon, Juan Ignacio Zoido e Dolors Montserrat. A eles instoulles o presidente da Xunta a defender a pesca e a agricultura galegas, aínda que sinalou como máximo responsable do que ocorra en Bruxelas ao xefe do Executivo central, o socialista Pedro Sánchez.

O presidente da Xunta puxo o foco sobre todo na situación do sector do mar e do agrario. "Se perdemos os fondos europeos pódovos asegurar que viviremos unha segunda crise", advertiu Núñez Feijóo.

O presidente do Executivo galego indicou que, a día de hoxe, "o noso orzamento son 500 millóns de euros menos dos que tiña Galicia hai 11 anos", polo que, se a isto se suma un recorte de fondos da Unión Europea que estima en 600 ou 700 millóns de euros do orzamento, "pódovos asegurar que non chegamos a fin de mes".

O líder dos populares galegos lembrou que no anterior período de negociación o Goberno español obtivo un resultado "excelente" que permitiu a Galicia manter o 85 por cento dos fondos europeos.

Feijóo reflexionou con que, debido á crise económica, Galicia non mellorou en converxencia, do mesmo xeito que o resto de comunidades de España, polo que "o lóxico" sería que se mantivesen os mesmos fondos.

"Por que agora nos asomamos ao precipicio dunha caída abrupta dos fondos?", preguntouse respecto dos recortes do diñeiro da PAC para España, e ata o 80 % dos fondos de desenvolvemento rural e dos fondos de cohesión para Galicia.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 anonimo

Entón, ten que tirarlles das orellas o xefe? O traballo de Zoido e Dolors Montserrat non o coñezo (pero o supoño, sobor de todo o o Zoido, menudo elemento), pero o que é polo que din que representa a Galiza, .... menudo lambido que nos caíu en desgracia.