A actriz Cristina Moreira dirixirá a gala dos XXIV Premios Teatro María Casares
A Asociación de Actores e Actrices de Galicia (AAAG) anticipa que o espectáculo que poderá ver o público será "unha homenaxe á profesión".
Por E.P. | A CORUÑA | 04/03/2020 | Actualizada ás 17:36
A actriz, directora e cómica Cristina Moreira será a encargada de dirixir a gala dos XXIV Premios de Teatro María Casares, que este ano se celebrarán no Teatro Rosalía de Castro da Coruña o próximo 26 de marzo.
Así o informa a Asociación de Actores e Actrices de Galicia (AAAG), que anticipa que o espectáculo que poderá ver o público será "unha homenaxe á profesión". "Facendo especial fincapé no que significa ser actor e actriz", engade.
A gala porá tamén no foco nas actuacións en pequeno formato e "nas particularidades, dificultades e esixencias que se lle impoñen ás actrices para exercer este oficio".
Con este obxectivo, a directora contará cun equipo eminentemente feminino. Así, o elenco estará formado por Déborah Vukusic, Arantxa Treus, Antía Costas e Rocío Romero. Por outra banda, Laura Iturralde encargarase da dirección de arte. A música estará a cargo de Nacho Muñoz.
