Nova acción contra as especies invasoras na área de Lentille para a eliminación de acacias
As Brigadas Deseucaliptizadoras traballarán na recuperación do monte autóctono da comarca ademais de camiños veciñais afectados pola mimosa.
Por Galicia Confidencial | Santiago de Compostela | 06/03/2020 | Actualizada ás 15:06
A comarca de Lentille será o novo punto de actuación das Brigadas Deseucaliptizadoras. Os traballos serán o sábado 21 de marzo dentro do marco das Xornadas de Voluntariado Ambiental de Lentille. Estas xornadas están organizadas pola Asociación Veciñal de Lentille xunto as Brigadas.
O obxectivo é combater a invasión de mimosa (Acacia dealbata) que sofre a comarca. A acción contra esta especie invasora desenvolverase nun monte particular onde se está levando adiante a repoboación con frondosas autóctonas. Xunto a esta actividade, tamén se limparán e rehabilitarán camiños veciñais que se viron afectados polas acacias. A tarefa consistirá en eliminar pés destas árbores para manter as autóctonas.
Os participantes comezarán o seu labor a partir das 09:30 para rematar ás 14:00 cunha comida e unha conferencia sobre a Vespa Velutina. Esta charla será a cargo de Lolo Andrade, especialista de Protección Civil e experto en pragas. A idea é explicar que facer contra a vespa invasora desde o voluntariado. Por último a xornada rematará nas termas de Prexigueiro, perto de Lentille.
