O prezo da vivenda sobe en Galicia por riba da media estatal

O prezo da vivenda libre aumentou un 3,9% en 2019 en Galicia respecto ao ano anterior, segundo os datos que publica este martes o Instituto Nacional de Estatística (INE).

Este avance é lixeiramente superior ao 3,6% de subida da media española. Supón o sexto ano consecutivo de avance do prezo na autonomía, xa que o último dato negativo produciuse en 2013. O 3,9% rexistrado en Galicia en 2019 é menor á alza do 4,1% do 2018, aínda que está por encima das subidas que houbo os anos previos.

Por tipos, o prezo da vivenda nova creceu un 5,9% en 2019. É máis acusada que a elevación no caso da vivenda de segunda man, do 3,6%. En taxa intertrimestral, os últimos tres meses do ano acaban cun aumento do 0,7%, o que contrasta co retroceso do 0,6% da media estatal neste período.

DATOS ESTATAIS

O prezo da vivenda libre subiu unha media do 5,1% en 2019 respecto ao ano anterior, o seu sexto repunte anual consecutivo tras seis anos de caídas e o menos pronunciado desde o exercicio 2016, segundo o Índice de Prezos de Vivenda (IPV) do Instituto Nacional de Estatística (INE) publicado este martes.

Entre 2008 e 2013, o prezo da vivenda libre rexistrou descensos anuais de distinta intensidade: do 1,5% en 2008, do 6,7% en 2009, do 2% en 2010, do 7,4% en 2011, do 13,7% en 2012 e do 10,6% en 2013. En 2007, cando comezou a elaborarse este índice, o prezo da vivenda libre experimentou un crecemento do 9,8%.

Non foi ata 2014 cando o prezo da vivenda libre volveu a taxas positivas, cun repunte anual medio do 0,3%, que en 2015 acelerouse ata o 3,6%, en 2016 ata o 4,7%, en 2017 ata o 6,2% e en 2018 ata o 6,7%. Esa tendencia de aceleración rompeu en 2019 cando o prezo se moderou respecto ao ano anterior.