Por Galicia Confidencial | Compostela | 22/10/2012 | Actualizada ás 21:26
O PSdeG agardará a ver que pasa logo do cónclave socialista de decembro, e no que se cedidirá sobre a continuidade de Alfredo Pérez Rubalcaba, para analizar a situación galega e tomar medidas tras a perda de sete deputados nos comicios do pasado domingo.
Foi a decisión que a dirección socialista, con Pachi Vázquez á cabeza, expuxo ante os membros da súa dirección. Con todo, o próximo día 10 celebrarase un Comité Nacional para profundar na "reflexión" sobre o ocorrido o domingo.
Os socialistas galegos tampouco avanzaron quen asumirá a portavocía e a presidencia do Grupo Parlamentario de cara ao debate de investidura de Alberto Núñez Feijóo, aínda que as fontes consultadas sinalan que podería continuar Pachi Vázquez.
Foi o secretario de Organización, Pablo García, o encargado de comparecer ante os medios para dar conta da xuntanza da dirección do partido convocada para analizar a derrota electoral e que se prolongou durante tres horas e media.
Críticas
Non tardaron en chegar as críticas e, mesmo, as peticións de dimisión tras o fracaso electoral. Se o propio domingo foi o ex presidente da Xunta, Emilio Pérez Touriño, quen en declaracións na SER foi moi duro co actual candidato do PSdeG, este luns foi Rego, outro dirixente da órbita "touriñista" quen, directamente, pediu a dimisión do secretario xeral socialista. "non houbo ninguén que lle fixese tanto dano ao partido en tan pouco tempo", sinalou.
Rego, orma parte do comité nacional do PSdeG-PSOE, polo que a xuntanza do vindeiro 10 de novembro presumese moi tensa. E é que ao seu xuízo, "non é o momento de reflexións, despois do dito onte polos cidadáns, é o momento das dimisións".
"Non cabe dúbida de que canto máis tempo a actual dirección do partido e o actual secretario xeral se manteñan á fronte da súa dirección máis tempo durará a sangría de votos dos cidadáns cara a outras formacións políticas e de abandono do PSOE", alertou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.