Verín súmase ao Proxecto “Bibliotecas en Igualdade”

O obxectivo deste proxecto é outorgar unha maior visibilidade ás escritoras, en especial ás propias de cada comunidade, completando os fondos bibliográficos da biblioteca con obras literarias escritas por mulleres de todos os tempos.

A partir da adhesión a  o proxecto “Bibliotecas en Igualdade”, elaborado pola asociación Clásicas y Modernas, proponse lanzar unha gran campaña de concienciación, capitaneada pola  Biblioteca Nacional de España en colaboración coas bibliotecas das diferentes Comunidades Autónomas, destinada á recuperación e posta en valor das obras escritas por mulleres.

Entre os compromisos adquiridos coa sinatura deste convenio atópase procurar un equilibrio na autoría das obras dispoñibles entre homes e mulleres e avanzar na confección dun catálogo dixital, con especial atención ás autoras de cada comunidade autónoma.

Clásicas y Modernas é unha asociación para a igualdade de xénero na ciencia e a cultura, fundada en 2009 por mulleres profesionais da literatura, o xornalismo, a música, o teatro, o cinema… nas súas distintas facetas (creación, xestión, investigación, crítica, teoría, ensino). Esta Asociación nace co fin de apoiar, difundir e promover as políticas de desenvolvemento da Igualdade na creación, tanto nacional como internacional.