Presos políticos e represaliados do franquismo: "Fraga foi un dos máximos secuaces da camarilla de Franco"
Esixen retirar as distincións honoríficas de Fraga e denuncian a "biografía secuestrada e ocultada" de Fraga durante a súa etapa como franquista.
Por Europa Press / Redacción | SANTIAGO DE COMPOSTELA | 13/03/2020 | Actualizada ás 14:41
Os presos políticos e represaliados de Galicia durante a ditadura franquista esixiron ás administracións públicas galegas a retirada das "distincións honoríficas" que aínda mantén o expresidente da Xunta e ministro durante o Franquismo, Manuel Fraga Iribarne.
O villalbés conserva títulos como "fillo adoptivo" de varios concellos e deputacións provinciais como a da Coruña. Por este motivo, persoas como Manuel Monge subscribiron un manifesto que trasladarán ás administracións públicas para que cumpran cunha cuestión que define como "hixiene democrática".
Para Monge e outros ex presos políticos como Elvira Souto, Manuel Villares, Nicanor Acosta ou Xan María Castro, "ningún ministro de Franco pode seguir mantendo distincións honoríficas polos servizos prestados a unha ditadura criminal".
Para eles existe unha "biografía secuestrada e ocultada" de Fraga. Na súa traxectoria constan "máis de 35 anos de militancia franquista e fascista". Utilizan as palabras do escritor José Manuel Caballero Bonald para facer fincapé nesta idea e explicaron que "Fraga se converteu nun dos máximos secuaces da camarilla de Franco e que as súas actuacións propiciaron a falta de liberdades e a persecución de disidentes".
"RAÍCES DO PP"
A través destes testemuños e outros feitos dos que se acusa a Fraga, como o ser negacionista do Holocausto xudeu, os presos políticos aseguran que o fundador de Alianza Popular deixa clara as "raíces do actual PP".
Ademais, non lles sorprende que na actualidade políticos de dereitas e de ultradereita asuman comportamentos relacionados coa exaltación do Franquismo e lembran cando Alianza Popular celebrou o seu primeiro congreso ao berro de "Franco, Franco".
TEMPO NOVO PARA GALICIA
Por outra banda, este venres os presos políticos reuniranse en Santiago para decidir como dar proxección e continuidade a esta iniciativa que naceu en 2018, 50 anos despois de que o Concello da Coruña outorgase o título de 'Fillo adoptivo' a Fraga Iribarne.
Apuntan a estender esta idea a todas as administracións para eliminar os restos de "toda a simboloxía franquista". Nicanor Acosta explicou que "moitas rúas de Galicia" aínda preservan a "simboloxía fascista" e é preciso un "tempo novo para Galicia".
Pola súa banda, Xan María Castro fixo fincapé nas "tendencias retrógradas" que considera que existen na democracia española a día de hoxe. Incide na necesidade de "restablecer a calidade democrática" e "limpar" o territorio de rescoldos ditatoriais.
Todos ofrecen o seu coñecemento e información da que dispoñen para que os Concellos poidan "retirar estas distincións" nun pleno local no "período de tempo máis breve posible" para botar ao "Franquismo fóra de Galicia".
