En Marea demanda "un plan de emerxencia social" para os colectivos "máis vulnerables"
Esixen que a Xunta e as Deputacións "asistan aos municipios" en labores como o Servizo de Axuda non Fogar (SAF).
Por E.P. | SANTIAGO DE COMPOSTELA | 15/03/2020 | Actualizada ás 12:00
O partido En Marea demanda "un plan de emerxencia social" á Xunta de Galicia para atender as "necesidades básicas nos domicilios" das persoas "máis vulnerables sen redes de apoio".
O partido enviou un comunicado este domingo no que reclama "actuacións" ante a "carencia de protocolos e instrucións observada" tras o anuncio de "medidas de orde sanitaria e social" do Goberno galego.
A xuízo desta forza política, existe unha "necesidade de atender a quen coida e a quen precisa coidados", polo que deben tomarse "medidas de acompañamento social e protección" para evitar "situacións de extrema gravidade" ante a expansión de COVID-19.
En concreto, fixeron referencia ao peche dos centros de día ou os centros escolares, que suspenden a súa actividade pero non contan con "medidas de protección social de carácter urxente" para os usuarios que quedan sen estes servizos.
Esixen que a Xunta e as Deputacións "asistan aos municipios" en labores como o Servizo de Axuda no Fogar (SAF), que é de competencia local, pero que en momentos como o actual require "asistencia coordinada e inmediata".
Para En Marea, deberían proporse "servizos mínimos" de asistencia a domicilio para reducir "riscos" de contaxio. Tamén suspender este servizo na súa modalidade de libre concorrencia, é dicir, para as persoas non dependentes.
Tamén reclama que se entregue material de protección aos traballadores auxiliares e que estes poidan entregar folletos informativos nos domicilios con medidas básicas de hixiene ou teléfonos de interese.
MESA DE COORDINACIÓN
Por outra banda, o partido ve necesario crear unha Mesa de Coordinación Sociosanitaria coas Consellerías de Política Social e Sanidade, representación do Sergas e servizos sociais comunitarios, para crear un plan de actuación de emerxencia social e dar cobertura ás persoas con especiais dificultades para "paliar as complicacións do illamento".
Tamén propoñen algo que xa puxeron en marcha algúns concellos galegos, como é o servizo de repartición a domicilio de alimentos.
