Detidos por intentar roubar nun bar en pleno estado de alarma
Denuncian a dous homes en Vigo que se saltaron o confinamento para ir comprar droga e consumila na rúa
Por Europa Press / Redacción | A CORUÑA | 25/03/2020 | Actualizada ás 13:11
A Policía Nacional detivo un home e unha muller por unha tentativa de roubo con forza en establecemento na Coruña, segundo informa a Xefatura Superior de Policía en Galicia.
Os feitos producíronse ao redor das 4,00 horas da madrugada deste luns, 24 de marzo, no estado de alarma declarado polo Goberno para frear o avance do coronavirus.
En concreto, foi unha testemuña quen chamou á sala do 091 indicando que había dúas persoas golpeando a porta dun bar con algún tipo de ferramenta, tentando forzar o seu acceso. A parella, ao decatarse de que unha persoa os viu, fuxiu do lugar.
Personada no lugar unha dotación policial, e grazas á descrición facilitada pola testemuña dos feitos, localizaron nas inmediacións ao home e á muller, e tras realizar as comprobacións oportunas, procedendo á súa detención.
Os policías puideron comprobar que o enreixado do establecemento se atopaba forzado, aínda que os autores non puideran acceder ao seu interior. Os detidos, de 39 e 32 anos de idade, xa foran detidos anteriormente por feitos similares.
DETIDOS EN VIGO POR IR MERCAR DROGA
Por outra banda, axentes da Policía Local de Vigo tramitaron denuncia contra dous homes por infrinxir o Real Decreto do estado de alarma, ao saír do seu domicilio para ir comprar droga na vía pública.
Segundo informaron fontes policiais, os feitos ocorreron o pasado luns pola noite, cando un veciño chamou ao 092 para alertar de que dous homes acababan de comprar droga e que a estaban consumindo na rúa, no Casco Vello da cidade.
Unha dotación trasladouse ao lugar e localizou a estas dúas persoas, un home de Vigo de 40 anos de idade, J.A.M., e outro de Ourense, de 45 anos, D.A.P., que recoñeceron aos axentes que abandonaran o seu domicilio (a máis dun quilómetro de alí) para ir comprar a droga.
Ambos foron denunciados por infrinxir o estado de alarma e, ademais, un deles tamén foi denunciado por infrinxir o regulamento de circulación, ao estacionar a súa motocicleta no barrio histórico sen autorización, e por levar un adhesivo na placa de matrícula.
