Por Galicia Confidencial | Santiago de Compostela | 28/03/2020 | Actualizada ás 21:55
Nos últimos días, persoal dependente da Consellería de Educación está percorrendo os centros educativos en busca de material susceptible de ser usado con fins sanitarios, principalmente, luvas e máscaras, se as hai, aínda que tamén requisando produtos desinfectantes, sobre todo, lixivia. A orde partiu directamente do Centro de Coordinación, que dirixe o presidente da Xunta e ten como obxectivo repartir ese material entre os concellos.
O problema é que non se cursou unha orde formal ás direccións dos centros que son testemuñas de como chega persoal para “arrepañar todo o que hai”, sen que teñan información previa. “Cando soubemos do asunto quedamos estupefactos. A Xunta non solo nos deu unha merda de material se non que pretende levarnos o que nós temos”, denuncian fontes consultados.
Nalgúns casos, ese material “requisado” pola Xunta é de titularidade municipal como traslada persoal docente e concellos contactados por GC. “Ese material é municipal debido a que a limpeza dos centros educativos a asumimos polos concellos e os mercamos con diñeiro municipal e ademais, dende os concellos, estamos organizándonos tendo en conta o material que temos en stock nas distintas dependencias”, indican as fontes consultadas.
“ESE MATERIAL É PARA OS CONCELLOS”
A propia consellería confirma, en declaracións a GC que, seguindo os protocolos establecidos na loita fronte ao Covid-19, deuse instrucións para a redistribución do material existente nos centros educativos susceptible de ser utilizado nesta crise sanitaria. “O material está sendo destinado aos concellos para o seu uso, principalmente, no Servizo de Axuda no Fogar e en Protección Civil, segundo as informacións facilitadas polos propios municipios.
Con todo, os concellos quéixanse de que estánlle dando o material que previamente lle están requisando. “É surrealista”, denuncia un alcalde de Pontevedra consultado por GC. “Ese material foi adquirido polo concello ou por empresas de limpeza contratadas por nós”, denuncia.
“Cómpre recordar que os centros están sen actividade docente presencial, polo que é preciso destinar todos os recursos alí onde sexan máis necesarios e ningunha outra administración atendeu á chamada de auxilio que fixo a Federación Galega de Municipios e Provincia”, explican desde a consellería. “Iso non é verdade porque desde as deputacións e mesmo desde a subdelegación do goberno se teñen ofrecido para axudar”, di o alcalde consultado.
DOAZÓNS DOUTRAS INSTITUCIÓNS
Precisamente, a Subdelegación do Goberno na provincia de Pontevedra entregou este venres á Xunta un total de 21.521 unidades de diverso material sanitario para o acceso ás medidas de protección necesarias debido á pandemia do Covid-19.
O INSS e a TGSS en Vigo puxeron a disposición, respectivamente, 410 unidades e 352 entre máscaras, luvas e lentes de protección. Pola súa banda, o Instituto Social da Mariña habilitou dous envíos uno con 2.364 unidades e outro con 2.164. Por último, o ISM en Bamio, proporcionou máis de 16.231 unidades de material entre desinfectante, batas, luvas de diferentes tallas, máscaras e resucitadores manuais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.