Por Europa Press / Redacción | SANTIAGO DE COMPOSTELA | 29/03/2020 | Actualizada ás 12:05
O número de afectados por coronavirus en Galicia crece un 11,34% desde o sábado, con 298 casos máis, ata situarse nos 2.925; á vez que tamén ascenden o número de altas (+58), 153 en total, e o de persoas falecidas (+11), ata os 61. Destes datos informou a Dirección Xeral de Saúde Pública da Consellería de Sanidade, que cada día actualiza as cifras que deixa esta pandemia na Comunidade.
Con respecto á pasada xornada, o crecemento de casos positivos en 24 horas reduciuse ata o 11,34% (+298), xa que o sábado o número de diagnósticos crecera un 18,8% (+416) en só un día. Por áreas sanitarias, a distribución dos pacientes é a seguinte: 681 en Vigo, 639 na Coruña, 480 en Santiago 415 en Ourense, 324 en Pontevedra, 244 en Lugo e 142 en Ferrol.
Ademais, tamén se contabilizan 153 persoas dadas de alta, 58 máis que o sábado (cando había 95). Neste sentido, os pacientes que reciben o alta cada día tamén vai en aumento e é que durante as últimas 24 horas produciuse a maior cantidade de tramitacións deste tipo ata a data. Duplican as rexistradas do venres ao sábado, cando levaron a cabo 28 ata chegar a eses 95 totais.
61 FALECIDOS
Por outra banda, o número de falecidos tamén creceu nas últimas horas coa morte dun home de 82 anos en Santiago que eleva ata as 61 as vítimas mortais en Galicia.
Desta maneira, o número total de persoas que sofren ou sufriron coronavirus na Comunidade sitúase nos 3.139 (o dato acumulado que reflicten as estatísticas do Ministerio de Sanidade). Así, a Comunidade galega representa o 3,98% por cento do total rexistrado en España (78.797), unha representación que é maior que a do sábado, cando Galicia supuña o 3,83% do total.
110 PACIENTES EN UCI
En canto á modalidade de atención que reciben os pacientes de coronavirus, a Consellería de Sanidade precisou que 122 permanecen na UCI (+12 respecto ao sábado), 707 están en unidades de hospitalización (+55) e 2.096 son atendidos a domicilio (+231).
Ademais, realizáronse un total de 14.440 probas para detectar conoravirus, 1.555 máis que as que se realizaron o sábado, segundo os datos facilitados pola Xunta.
061 SÓ PARA EMERXENCIAS
O Goberno galego destaca que continúa traballando desde a "máxima coordinación interdepartamental" e co Ministerio de Sanidade, tamén mantendo o contacto con todos os axentes socioeconómicos de Galicia. Neste sentido, reitera que segue alerta, actualizando todas as medidas e recomendacións e en vixilancia permanente.
Sanidade apelou á cidadanía a empregar o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
Ademais, lembrou que o Servizo Galego de Saúde (Sergas) ten a disposición da cidadanía unha páxina web (https://coronavirus.sergas.gal), na que se pode consultar información dirixida á poboación, aos profesionais sanitarios e a outros colectivos.
DOCE POLICÍAS AFECTADOS
O número de policías nacionais en Galicia infectados con coronavirus ascende xa a 12 tras confirmarse os positivos dun axente en Viveiro e outro na Coruña, cidade na que xa hai seis policías con COVID-19.
Segundo fontes do Sindicato Unificado de Policía consultadas por Europa Press, un total de 75 axentes atópanse en illamento á espera de realizar as probas para saber se padecen coronavirus. Seis dos axentes infectados en Galicia pertencen á Comisaría da Coruña. O seis restantes repártense por Pontevedra, Salvaterra, Viveiro, Ourense, Ribeira e Madrid --onde está destinado un axente lucense--.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.