Por E.P. | SANTIAGO DE COMPOSTELA | 04/04/2020 | Actualizada ás 11:10
Un total de 130 detencións e máis de 14.000 denuncias foron rexistradas en Galicia por incumprir as medidas decretadas polo estado de alarma para facer fronte á pandemia do coronavirus.
Diso informou este sábado o delegado do Goberno en Galicia, Javier Losada, quen lembrou que os xulgados galegos xa decretaron os primeiros ingresos en prisión por saltarse as normas.
Nun comunicado, o delegado detalla que, ata o venres, a Policía Nacional, a Garda Civil e as policías locais sumaron 13.969 propostas de sanción, que poden oscilar entre os 601 e os 30.001 euros. Nos casos de persoas reincidentes, aumentan de grao e parten de 10.400 euros.
SANCIÓNS POR CORPO
En concreto, segundo os datos da Delegación do Goberno, a Policía Nacional propuxo sancións para 4.752 persoas, con 79 detencións; a Garda Civil a 5.913, con 28 detencións; e as policías locais a 3.304, con 23 detencións. Ademais, distintos xulgados galegos xa ditaron os primeiros autos ou sentenzas, que recolleron desde o ingreso en prisión de forma provisional a condenas con penas de cárcere.
Con todo, o delegado do Goberno incidiu en que o respecto á normativa é maioritario e mostrou o seu desexo de que así continúe. Ademais, agradeceu á poboación o seguimento das normas e lembra que a única maneira de frear o virus é quedar en casa.
Nese sentido, incide en que é fundamental protexer a quen se están xogando a vida: o persoal sanitario, as forzas de seguridade e as persoas que traballan en servizos esenciais como alimentación ou transportes.
REFORZO DOS CONTROIS
Pese ao respecto maioritario, as forzas e corpos de seguridade volverán reforzar este fin de semana os controis para evitar os desprazamentos a segundas vivendas ou zonas de lecer. O dispositivo especial estenderase durante toda a Semana Santa para asegurar o illamento que, como sinalou a Delegación do Goberno, é a única maneira de actuar fronte á cadea de contaxio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.