Os concellos e deputacións galegas xa poden celebrar sesións e adoptar acordos por medios telemáticos
A medida foi aprobada polo Consello de Ministros.
Por E.P. | SANTIAGO DE COMPOSTELA | 05/04/2020 | Actualizada ás 11:28
Todos os concellos e deputacións de Galicia xa poden celebrar sesións plenarias e adoptar acordos a través de medios telemáticos desde esta semana.
Esta medida foi aprobada polo Consello de Ministros, segundo lembrou este domingo o delegado do Goberno na Comunidade, Javier Losada, nun comunicado.
Desta maneira modifícase a Lei 7/1985, reguladora das Bases de Réxime Local, para facilitar o funcionamento ordinario e democrático destas entidades no momento actual de pandemia.
Na mesma, tamén se describen os medios electrónicos considerados válidos para realizar estes encontros: audioconferencias, videoconferencias e sistemas tecnolóxicos ou audiovisuais.
En todo caso, deben garantir adecuadamente a seguridade tecnolóxica, a efectiva participación dos seus membros, a validez do debate e a votación dos acordos que se adopten. Desta maneira, mantense a seguridade democrática dos municipios.
