A defensa do empresario detido en Santiago di que tiña chave e que podía vender o que había dentro

A defensa do empresario Javier Conde detido en Santiago de Compostela polo suposto roubo de material sanitario nunha nave no Polígono do Tambre asegura que tiña "autorización" para "limpar e vender" as instalacións. Así o manifestou, en declaracións a Europa Press, a avogada Otilia Sánchez Garrido, que exerce a defensa do empresario, que o sábado pasado quedou en liberdade investigado por un suposto roubo con forza, pero sen medidas cautelares.

A avogada explicou que hai unha investigación xudicial aberta pero as cifras feitas públicas pola Policía Autonómica, en relación ao roubo duns dous millóns de máscaras e outro material sanitario valorado nun cinco millóns de euros, "non aparecen no atestado" nin na "declaración da administración concursal". Tras rexeitar a "cifra astronómica" apuntada pola Policía Autonómica, a letrada insistiu en que "non hai tal cifra nin cantidade", en relación ao valor e número de máscaras, respectivamente. De feito, estimou en menos de medio millón de euros "o que estaba alí".

En relación ao feito de que o empresario detido no operativo policial declarase en sede xudicial que vendera material que había nas instalacións, a avogada insistiu en que tiña "autorización de baleirar e limpar a nave" na que, puntualizou, había "material caducado". Deste xeito, ratificou que o seu cliente vendera material da nave para despexala e pola á venda na súa inmobiliaria co permiso da propietaria. Por iso, apuntou a posibles "irregularidades", pero rexeitou que se trate dun roubo con forza nas cousas porque "tiña a chave".

Neste sentido, en relación ao operativo policial comentou que "a Policía Autonómica decatouse da situación da nave (que había material sanitario) e a persoa que tiña a posesión da nave é Javier e é localizado", sinalou para matizar que el xestionaba a venda do inmoble con "autorización" da administración concursal da mesma.Por iso, destacou que o xulgado enviou oficios a Mallorca "para saber que autorización tiña" o investigado pola subtracción do material sanitario da nave a principios de febreiro.

ROUBO

Pola súa banda, o empresario defendeu que "o acceso (a esas instalacións) se realizou sempre con autorización". En declaracións a Europa Press, Javier Conde explicou que "desde 2015" dispón das chaves da nave asaltada, xa que ten estas instalacións "á venda" na súa inmobiliaria en Santiago de Compostela.

Conde destacou que ten "por escrito", e así o presentou no xulgado, autorización para acceder á nave. "Teño autorización para entrar e cambiar fechaduras", puntualizou, para matizar que cando a Policía acudiu a ela constatou que alí "faltaba material".

Respecto diso, tras ser detido e posto en liberdade este sábado "sen fianza" nin medidas cautelares, pero investigado por un delito de roubo con forza, Javier Conde confirmou que "existen unhas dilixencias xudiciais en trámite" nas que se está "defendendo".

Conde insistiu en que conta con "autorización por escrito dos propietarios" para acceder a esa nave cuxa venda xestiona na súa inmobiliaria, feito que, explicou, agora "nega a administradora concursal" da mesma. "Presentouse o escrito no xulgado", abundou, para estimar que se deberá "facer unha proba caligráfica" para verificalo.

"TODO ESTÁ ACREDITADO"

"Pola miña persoa non se cometeu ningún delito de roubo, xa que o acceso se realizou sempre con autorización", subliñou Conde. "Nin se dispuxo na cantidade, nin en valor, aos que se fai mención", abundou en relación ao material sanitario subtraído, que a Policía Autonómica valorou nuns cinco millóns de euros.

Este empresario asegurou que "todo isto está acreditado ante o xulgado nas dilixencias xudiciais abertas". Por iso, apelou á "presunción de inocencia, en tanto non se avance nas dilixencias citadas e non se tramite o procedemento xudicial correspondente"

EUROPOL

A Oficina Europea de Policía (Europol) traballa para localizar en Portugal o destino do material sanitario subtraído nunha nave en Santiago de Compostela. Así o explicaron fontes próximas á investigación, que sinalaron que Europol procedeu a realizar xestións en Portugal para localizar o ou os destinatarios da mercadoría sanitaria.

As mesmas fontes confirmaron que o empresario Javier Conde foi detido en relación con este roubo porque "hai probas que o incriminan". Ademais, os investigadores contan con "probas de vehículos recollendo material" da nave.

ÁREA EMPRESARIAL DO TAMBRE

A Asociación Área Empresarial de Tambre decidiu tomar medidas para reforzar a vixilancia na zona industrial, sobre todo durante os próximos días de Semana Santa e tras coñecerse este suceso. En concreto, manterase o control e a supervisión das instalacións durante as 24 horas entre este xoves e o domingo. O presidente da asociación, José Fernández Albores, cre "necesario" tomar estas medidas nun momento no que o 95 por cento das empresas están pechadas".

"Estamos xa moi preocupados polos tempos que se aveciñan, así que dada a sucesión de catro festivos na práctica e despois das últimas incidencias rexistradas na zona, temos que velar pola seguridade todo o que poidamos", trasladou.

Actualmente, permanecen abertas unhas cinco gasolineiras, cinco cadeas de alimentación e unha decena de compañías de transporte. Fernández avanzou, á súa vez, que a asociación esta traballando en diversos ámbitos para ofrecer diversas liñas de axuda, tanto económico-financeiras como de carácter social, humanitario e de asesoramento.