Por Europa Press / Redacción | SANTIAGO DE COMPOSTELA | 08/04/2020 | Actualizada ás 15:40
Os principais grupos da oposición coincidiron este mércores en criticar duramente ao goberno galego pola súa xestión das residencias de maiores tras o aumento do número de mortos e contaxiados nestes centros. Así, reclamaron a intervención destes centros e que se investigue o que está acontecendo.
O secretario xeral do PSdeG, Gonzalo Caballero, instou á Xunta a extremar as medidas para atallar a situación nas residencias de maiores e pediu á valedora do Pobo, Dolores Fernández Galiño, que interveña para garantir os dereitos dos usuarios destes centros. Nunha rolda de prensa telemática ofrecida este mércores, o xefe de filas dos socialistas galegos asegurou que a situación destes espazos, nos que se rexistraron uns 900 contagios, "preocupa" ao PSdeG.
"Cada día que pasa os datos son máis preocupantes e a Xunta de Galicia ten que cumprir escrupulosamente con todas as competencias e intervir nas residencias nas que existen contaxios amplos e masivos", manifestou Gonzalo Caballero, que urxiu "bolsas máis amplas de persoal" para estes centros e a "protección" adecuada.
O socialista, que lamentou que a conselleira de Política Social non solucionase as dúbidas da oposición na súa comparecencia no Parlamento, explicou que lle seguen chegando queixas de familias e traballadores "moi preocupados" pola situación que se vive nestes espazos en Galicia.
"Sabemos que hai denuncias vía xudicial e que existen demandas e reclamacións ante a valedora do Pobo", sostivo Gonzalo Caballero, que pide á defensoría galega que tome "todas as medidas necesarias" para defender e protexer aos dereitos dos cidadáns que residen nestes centros. "Por iso confiamos en que, respondendo as queixas e de oficio, --a valedora-- poña o tema das residencias na axenda de prioridades da defensa da cidadanía", subliñou o secretario xeral do PSdeG, que incidiu en que os maiores e as persoas con diversidade funcional "son os cidadáns máis vulnerables" nesta situación.
GALICIA EN COMÚN
"Estamos a recibir denuncias de familias de usuarios e de traballadores de residencias que indican que se está pondo en risco as súas vidas", manifestou tamén o voceiro en Común, Antón Gómez Reino, que cualificou de "vergoña" que tivese que ocorrer unha epidemia para "pór ao descuberto" as "grandes carencias" de "tantos anos de recortes e privatizacións" no sistema asistencial á terceira idade.
O portavoz da coalición insistiu en que a Xunta ten que exercer as súas competencias e intervir e medicalizar as residencias. "Levamos semanas dicíndoo", subliñou. Ademais, instou á Xunta a dar a coñecer todos os datos sobre a afectación da epidemia na cidadanía galega. "Se queremos combater eficazmente a epidemia, temos que coñecer todos os datos sobre a súa expansión e a súa gravidade", argumentou Gómez Reino, que instou a Feijóo a "actuar con transparencia e lealdade á cidadanía". "Isto non se combate só con propaganda", deixou claro o tamén secretario xeral de Podemos Galicia.
BNG
A portavoz nacional do BNG, Ana Pontón, reclamou que os maiores que non presenten síntomas de covid-19 e así o queiran e soliciten, poidan pasar o confinamento en casa das súas familias, tras as probas de confirmación pertinentes. Ademais, avanzou que os nacionalistas, unha vez pase o estado de alarma, pedirán unha investigación no Parlamento de Galicia para que as familias "coñezan" o que ocorreu nestes centros e se se actuou con protocolos de protección desde o primeiro momento.
Para a dirixente nacionalista, é "prioritario" que a Xunta "actúe" e bote ao carón "o abandono" de funcións. Reiterou que ten que "anticiparse e intervir todas as residencias deste país, para actuar conforme aos protocolos establecidos". Entre outras cuestións, Pontón sinalou que hai que "acelerar as probas para ver se hai focos en residencias" e garantir o material adecuado, nesta atención en residencias, así como no servizo de axuda no fogar. Así mesmo, reclamou un "protocolo de información ás familias", para que poidan coñecer a situación dos residentes.
Entre as medidas propostas, tamén se atopan que "aquelas persoas e familias que se queiran facer cargo" das persoas internadas, se lles permita " facelo". Para iso, é preciso levar a cabo as "probas necesarias" para garantir que "non hai contaxios", e asegurarlles a praza na residencia cando termine o confinamento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.