A Xunta di que pode utilizar os test rápidos do Goberno central para facer un estudo entre a poboación
Non sabe aínda cando dará inicio a esta investigación para coñecer "a afectación" do virus na poboación e no que poderían participar 100.000 persoas.
Por Europa Press / Redacción | SANTIAGO DE COMPOSTELA | 12/04/2020 | Actualizada ás 11:47
A Consellería de Sanidade levará a cabo un estudo clínico para coñecer a "afectación" do virus na poboación galega a través dunha mostra que pretende chegar a 100.000 persoas.
O obxectivo é "coñecer a porcentaxe de poboación que puido estar afectada por este virus" na Comunidade e así determinar "a realidade" de "afectación" entre a cidadanía galega, explicou este domingo o xerente do Sergas, Antonio Fernández Campa, nunha entrevista na Radio Galega, recollida por Europa Press.
O responsable da xerencia do Servizo Galego de Saúde sinalou que un dos problemas desta pandemia é que moitas persoas son portadoras e transmisoras do virus "sen presentar síntomas externos", polo que ademais de pasar a enfermidade, puidérona contaxiar. Con este estudo, preténdese coñecer "o nivel de defensas da poboación" para determinar a porcentaxe de poboación que pasou polo virus sen ser diagnosticado.
Para conseguilo, non se utilizarán sistemas PCR que diagnostican o virus, senón probas de marcación de "antíxenos e anticorpos" que arroxen luz sobre a "realidade da poboación galega" e as posibles "medidas preventivas" a adoptar ante unha posible onda ou un rebrote.
Este estudo levará a cabo nos hospitais de Vigo, A Coruña e Santiago, que son os que teñen os laboratorios con "maior capacidade diagnóstica". Alí analizaranse as mostras que desde o Sergas esperan que chegue a 100.000 persoas. Unha cifra que Fernández Campa considera "significativa" e "representativa".
A selección dos participantes realizarase a través de "procesos estatísticos" que atendan á "estrutura da poboación e á dispersión xeográfica". Por tanto, o Sergas quere realizar estas probas a través dos servizos de Atención Primaria para, así "ter un acceso maior, territorializado e sinxelo á poboación".
INICIO DA MOSTRAXE
Aínda que o xerente do Sergas non puido determinar cando se iniciarán as probas deste estudo, determinou que están "en proceso" e que "é importante levalo a cabo canto antes", pero sempre "cunha mostraxe correcta". Ademais, na entrevista, Fernández Campa precisou que o test rápidos que enviou o Goberno estatal "poden ser útiles" neste estudo. "Teñen unha utilidade complementaria", explicou na radio.
