A Xunta reactiva os traballos e trámites das obras públicas

O Executivo e o sector da construción coincidiron na prioridade de garantir a seguridade dos traballadores, velando polo "estrito cumprimento das medidas para evitar risco de contaxios".

Por E.P. | SANTIAGO DE COMPOSTELA | 13/04/2020 | Actualizada ás 14:15

Comparte esta noticia

A conselleira de Infraestruturas e Mobilidade, Ethel Vázquez, informou este luns ao presidente da Federación Galega da Construción, Diego Vázquez Reino, e aos representantes das asociacións provinciais, da reactivación inmediata de traballos e trámites administrativos en obra pública, que supoñen a mobilización este ano dun investimento autonómico de 160 millóns de euros e garanten 1.400 postos de traballo en 2020.

Ethel Vázquez, acompañada polo director da Axencia Galega de Infraestruturas, Francisco Menéndez, mantivo unha nova reunión por videoconferencia co sector da construción, coincidindo co reinicio da actividade tras 15 días de paralización polo estado de alarma reforzado decretado polo Goberno.

Neste encontro, a Xunta e o sector da construción coincidiron na prioridade de garantir a seguridade dos traballadores, velando polo "estrito cumprimento das medidas para evitar risco de contaxios".

A responsable de Infraestruturas trasladoulles o apoio e colaboración da Xunta, que puxo á súa disposición unha guía de recomendacións de seguridade específicas para as obras. Estas directrices reforzarán as medidas organizativas, de hixiene e de distanciamento que xa activasen as empresas.

ACTUACIÓNS DE INTERESE PÚBLICO

Ethel Vázquez subliñou que a reactivación das obras contribúe a "minimizar o impacto económico e garantir a continuidade do emprego no sector" e explicou que en moitos casos trátase de actuacións de interese público, como a continuación da construción de centros de saúde ou o comezo da execución do Hospital de Pontevedra.

Tamén incidiu naqueles proxectos que garanten a calidade das augas e a saúde pública, como o saneamento da Malata, a mellora da depuración de Praceres ou a futura potabilizadora de Betanzos.

Ademais, destacou a continuidade das obras de mellora da seguridade viaria e tamén daquelas que facilitan a actividade loxística, como o acceso aos polígonos de Morás e San Cibrao das Viñas ou a ampliación da avenida da Deputación en Sabón.

Finalmente, puxo en valor o avance nas estacións intermodais de Santiago, Ourense, Pontevedra e Vigo, xa en marcha; ou o acondicionamento das entradas dos Camiños en Compostela, que incrementarán a competitividade e a capacidade de atracción turística da comunidade no futuro.

A conselleira de Infraestruturas, Ethel Vázquez, mantén unha videoconferencia co sector da construción.. Xunta de Galicia
A conselleira de Infraestruturas, Ethel Vázquez, mantén unha videoconferencia co sector da construción.. Xunta de Galicia | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta