O tráfico por estrada caeu un 92% o Domingo de Resurrección en Galicia
O retroceso é similar á media de caída no Estado, do 91,23%.
Por Europa Press / Redacción | SANTIAGO DE COMPOSTELA | 13/04/2020 | Actualizada ás 16:43
O tráfico por estrada caeu en Galicia un 92% o Domingo de Resurrección, 12 de abril, en comparación cun domingo calquera (non de Semana Santa), segundo os datos feitos públicos este luns pola Dirección Xeral de Tráfico (DXT). O retroceso é similar á media de caída no Estado, do 91,23%. O tráfico de vehículos pesados descendeu un 55% en Galicia, mentres a diminución en España foi do 61%.
No Estado, neste quinto domingo en estado de alarma producíronse 106.118 movementos de longo percorrido polas vías competencia da DXT, un dos datos máis baixos desde que se decretou o confinamento o pasado 14 de marzo. Nun domingo equivalente, produciríanse 1.209.656 viaxes.
Dos 106.118 vehículos que circularon este domingo que marcou a fin de Semana Santa, 55.293 foron vehículos lixeiros (turismos, motos), o que supón un descenso do 94,87% con respecto a un domingo equivalente, día en que circularían polas estradas 1.077.300 vehículos.
Con respecto a camións e transporte de mercadorías, este domingo circularon polas estradas 50.825 vehículos (o 47,89% do total de movementos por estrada), rexistrando tamén unha das cifras máis baixas desde que España está en estado de alarma.
Igualmente, viuse afectado considerablemente o tráfico fronteirizo polas restricións á mobilidade, rexistrándose un descenso do 94,38% con respecto a un domingo calquera. En concreto, baixou o tráfico un 94,60% no caso da fronteira con Francia e un 94,16% na fronteira con Portugal.
