Por Galicia Confidencial | A Coruña | 15/04/2020 | Actualizada ás 13:51
La Voz de Galicia pídelle aos seus traballadores que reenuncien ao a un salario para evitar ir a un ERTE. Unha petición que entra dentro dun “plan de choque” para afrontar a crise do coronavirus e que podería non quedar exenta doutras medidas futuras. Dentro destas medidas, o medio tamén prescindiu dos colaboradores externos.
Así, o deu a coñecer o Comité Intercentros deste medio de comunicación tras manter na tarde do martes unha reunión telemática coa dirección da empresa. “Á parte doutras medidas a empresa propón aos seus traballadores renunciar á aplicación dun ERTE a cambio da paga de abril que, como sabedes, responde á maior parte da devolución da minoración salarial do 2019”, recolle o escrito que o comité lle remitiu ao conxunto dos traballadores.
A proposta supón a devolución en tres prazos (nóminas de abril, maio e xuño) da cantidade que se lle ingresou aos traballadores o 6 de abril. “Aos que quedaron exentos da minoración aplicaráselles unha rebaixa do 2 % até final de ano”, engade.
A empresa puntualizou a Galicia Confidencial que non se trata dunha nómina mensual, senon que o que se devolve é unha "paga de beneficios". "O que se trata é de devolver unha paga de beneficios que xa se nos fixo en abril e que é casi o 60 por cento do total da paga de beneficios: o outro 40 derenolo en xaneiro. O mes de abril claro que se paga", indican.
O comité considera a proposta un “punto de partida nunha negociación que, necesariamente, deberá ser rápida”. Con todo, advirte que a formulación “é insuficiente” se non vai acompañada doutras contrapartidas xa que a empresa,di, “só se compromete a mellorar as porcentaxes de devolución da minoración actualmente en curso para a hipotética devolución do ano que vén”-
O órgano de representación dos traballadores anuncia que a proposta será estudada e consultada con asesores e que en vindeiros días fará unha cotraoferta. “O compromiso do comité, como é habitual, é que, sexa cal for o acordo que se adopte, deberá ser primeiro explicado (a través de asembleas telemáticas) e posteriormente ratificado polo persoal a través dunha votación”, engade o comunicado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.