Por Europa Press / Redacción | SANTIAGO DE COMPOSTELA | 15/04/2020 | Actualizada ás 19:04
A Feira Internacional Abanca Semana Verde de Galicia decidiu pospor a 2021 a edición deste ano, prevista para a primeira semana de xuño no recinto feiral de Silleda.
Ante a "incerteza" xerada pola crise sanitaria do coronavirus, a Fundación Semana Verde acordou aprazar ao próximo ano a 43ª edición da feira, que terá lugar do 3 ao 6 de xuño de 2021. A Fundación resalta que a decisión radica en motivos de "responsabilidade social e economómica" ante a emerxencia sanitaria e empraza a "centrar esforzos en facer unha gran edición" da feira en 2021, ano Xacobeo e no que se cumpren 25 anos da inauguración do recinto de Silleda.
No comunicado, apuntan que a posibilidade de mover a cita a outra data este ano contaba cos inconvenientes da "incerteza" sobre a evolución da crise e que esta puidese ter impacto en que a feira, que o pasado ano tivo 128.000 visitantes, non puidese celebrarse "con normalidade". Deste xeito, segundo a opinión solicitada entre as empresas, a Fundación sinala que estas cren que a súa participación estaría no aire ata o último momento, o que suporía un impacto na organización do evento.
Por outra banda, no misom comunicado, a Fundación Semana Verde tamén informa que a feira Enexétika, prevista para medidados de marzo pero que tivo que ser suspendida, decidirá a nova data para a súa celebración "cando a situación relativa á crise sanitaria se normalice". Así, afirma que os expositores que confirmaran a súa presenza na feira trasladaron a súa intención de participar na cita nas novas datas que a organización decida.
USC MICROMECENADO
Plataforma de Micromecenado da Universidade de Santiago 'Sumo Valor' abriu unha nova liña destinada a "acelerar o proceso de investigación contra a COVID-19", tal e como explicou este mércores o reitor, Antonio López.
A finalidade desta campaña é conseguir fondos para fomentar e reforzar diversas liñas de investigación actuais relacionadas co SARS-CoV-2, integrando áreas de coñecemento diversas. Así, os fondos captados destinaranse a sistemas de detección do virus en diferentes matrices, investigación en vacinas, análises dos impactos económicos, modelización da pandemia e estudos epidemiolóxicos.
Os grupos de investigación, lembrou o reitor, "solicitan financiamento externo a diferentes entidades", pero "esas convocatorias poden tardar meses en resolverse". "Con esta liña de micromecenazgo, pretendemos lograr que os nosos equipos dispoñan xa de recursos para a fase inicial das súas investigacións", engadiu.
A través desta iniciativa, a USC quere conseguir ata 100.000 euros, que servirán para acometer traballos en diferentes áreas de coñecemento. O prazo para realizar doazóns termina o 31 de xullo de 2020.
DEBATE SOBRE A XESTIÓN DA PANDEMIA
O ciclo de relatorios en liña promovido polo Campus da Cidadanía da USC para achegar á sociedade unha visión multidisciplinar da Covid-19 e dos efectos que está a provocar esta pandemia, continúa este xoves, a partir das 18,00 horas, cunha nova sesión a cargo de Antón Losada, profesor de Ciencia Política e Socioloxía da USC, que ofrecerá a conferencia 'Xestión de crise, COVID-19 e profetas do pasado'.
A intervención de Antón Losada poderá seguirse a través dunha ligazón aberta ao público en xeral na plataforma Microsoft Teams. O esquema das videoconferencias programadas, que arrincou Juan Gestal, contempla, ao final de cada intervención, o desenvolvemento dun foro de debate virtual no que as persoas rexistradas como público poderán formalizar as preguntas que estimen oportuno.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.