Proposta da Deputación de Pontevedra para aplicar test de dobre banda en empresas con máis de 100 traballadores
A presidenta provincial de Pontevedra, Carmela Silva, pediulle por carta ao presidente da Xunta, Alberto Núñez Feijóo, a mellora en condicións de traballo ademais de que entenda o documento "como unha achega con ánimos positivo".
Por E.P. | PONTEVEDRA | 20/04/2020 | Actualizada ás 18:17
A Deputación de Pontevedra trasladou á Xunta a idea de que se apliquen test de dobre banda ao persoal daquelas empresas galegas de máis de cen traballadores. É, tal e como explicou a institución que preside Carmela Silva, unha "demanda dos alcaldes da provincia" de municipios de menos de 20.000 habitantes, que remitiron á súa vez esta preocupación do persoal de atención primaria dos seus municipios.
Así, nunha carta remitida este luns ao presidente da Xunta, Alberto Núñez Feijóo, a titular da Deputación de Pontevedra sinala que "aínda que a totalidade das empresas e industrias" están a facer "un esforzo enorme para garantir a seguridade do seu persoal", é "certo que moitos medios de produción" obrigan a contactos interpersoais que "poden ser o foco de contaxios".
Por iso, "para evitar posibles crecementos da pandemia" e "garantir unhas adecuadas condicións de prevención", os alcaldes da provincia propuxeron solicitar á Xunta a posibilidade de facer test de dobre banda "en todos aqueles centros de traballo nos que, pola súa casuística de acumulación de persoal, determinen as autoridades sanitarias".
A presidenta da Deputación de Pontevedra finalizou a súa misiva indicando que espera que se entenda a carta como "unha achega con ánimo propositivo que axude a erradicar, na medida do posible, a propagación" da covid-19.
