O sector aeronáutico e aeroespacial prevé caídas "de entre o 7 e o 14%"
Os proxectos en marcha finalizaranse pero lamentan a "incerteza" a medio prazo.
Por E.P. | VIGO | 24/04/2020 | Actualizada ás 19:27
A xunta directiva do Consorcio Aeronáutico Galego (CAG) reuniuse de forma telemática este venres para abordar o impacto da crise sanitaria do coronavirus no sector, e constatou que, aínda que as empresas seguen traballando nos contratos que están en vigor, prevense caídas de "entre o 7 e o 14 por cento", así como posibles atrasos ou mesmo suspensión en novos encargos.
Segundo trasladou o Consorcio, a pandemia e as súas repercusións están a ter un "forte" impacto no sector aeronáutico e aeroespacial, derivado do peche de fronteiras e das restricións á mobilidade, que desembocaron nunha caída drástica e mesmo na paralización do transporte aéreo.
No caso das empresas galegas do sector, que viña rexistrando taxas de crecemento dun 2 %, tanto en facturación como en creación de emprego, as súas perspectivas agora "están en perigo", condicionadas polo comercio exterior. De feito, o CAG lembrou que xa está a notar o impacto no comercio internacional, con decisións como a suspensión da feira ILA de Berlín.
"O maior problema actual é a incerteza, xa que as preisiones de caída van desde un 7 a un 14 %, unha marxe ampla e impredicible, como para que sexa asumido por calquera empresa", lamentou o Consorcio.
PERSPECTIVAS PARA 2021
Finalmente, destacou que, en xeral, os proxectos que actualmente están en marcha e contratados, mantéñense e finalizaranse, aínda que non sen dificultades. Con todo, as empresas temen un impacto máis profundo en 2021, por posibles cancelacións de novas contratacións e encargos (relacionados coa crise nas aerolíneas).
En todo caso, o Consorcio puxo en valor o "potencial" do sector e a súa aposta por innovar, e apelou a facer "un esforzo" para abrirse a novos mercados, como o dos vehículos non tripulados, os helicópteros ou a aviación militar.
