Gadis doa máis de 300.000 botellas de auga aos profesionais das residencias de maiores

Supermercados Gadis emprende unha nova acción orientada ao persoal de 397 residencias da terceira idade localizadas en Galicia e Castela e León para "recoñecer o labor dos traballadores" dos servizos esenciais.

A compañía repartirá máis de 300.000 botellas de auga entre os empregados dos centros

asistenciais. "Agradecer e recoñecer publicamente o importante labor que están a realizar estes profesionais, que velan polo benestar dos maiores nun momento especialmente complexo", é o obxectivo desta última iniciativa que pon en marcha a compañía baixo a campaña #Gadiscolabora.

A primeira repartición, composta por máis de 100.000 botellas de auga, xa se está levando a cabo. Ademais, a empresa ten previsto que se realicen outras dúas entregas de cantidades similares de forma quincenal.

Dos 397 centros, tanto públicos como de xestión privada, aos que vai enfocada esta iniciativa,

260 están localizados en Galicia (77 na Coruña, 41 en Lugo, 83 en Ourense e 59 en Pontevedra). As 137 instalacións asistenciais restantes están situadas en Ávila (8), León (25), Palencia (21), Salamanca (17), Valladolid (51) e Zamora (15), as seis provincias de Castela e León onde a compañía conta con Supermercados Gadis.

"A proximidade é un dos valores máis destacados da filosofía empresarial", indica Gadis, que 

busca "reforzar o compromiso social" e estar "máis próximos á cidadanía". Entre outras iniciativas, Gadis sobresae a entrega de 30.000 quilos de produtos non perecedoiros a 11 bancos de alimentos de Galicia e Castela e León, e a repartición de máis de 600.000 botellas de auga, en total, a profesionais sanitarios de 46 hospitais públicos e privados e aos traballadores de 397 residencias de ambas as comunidades autónomas.

Estas medidas forman parte do plan de Responsabilidade Social Corporativa da compañía,

con máis de 2.100 accións anuais.