O Festival Internacional de Cine de Ourense mantén a súa celebración entre o 25 de setembro e o 3 de outubro

O Ourense Film Festival (OUFF) mantén a súa celebración nas datas anunciadas, do 25 de setembro ao 3 de outubro, cunha programación na que terá especial protagonismo a celebración do seu 25 aniversario.

Ademais da Sección Oficial competitiva e outras paralelas, potenciarase o premio dedicado á mellor produción galega participante na presente edición, o Galicia-Xacobeo, dotado con 12.000 euros.

Segundo a organización, trátase dun galardón transversal para calquera película de produción ou coprodución galega que participe no certame e será concedido por unha comisión formada pola Fundación Carlos Velo, a Deputación de Ourense e a Xunta de Galicia.

O prazo para a recepción de películas que queiran participar na Sección Oficial do OUFF 2020 xa está aberto. Os filmes interesados poderán facer a inscrición a través das plataformas FESTHOME e Click for Festivals, ademais de facelo por medio da web do propio festival e da dirección electrónica ouff@depourense.es.

As películas que se presenten deberán estar producidas nos anos 2019 ou 2020. Poderán ser obras de ficción, de animación ou documentais e deben contar cunha duración superior a 60 minutos, ademais de non exhibirse nin terse editado comercialmente en España. O prazo de recepción finaliza o 15 de xullo.